დეტალები: საარჩევნო საბჭოს თავმჯომარემ თქვა, რომ დათვლილია ხმების 99,43% და ერდოღანს 52,14% აქვს, ქილიჩდაროღლუს კი — 47,86%.

  • "პირველადი მონაცემების შედეგად, პრეზიდენტად ბატონი რეჯეფ თაიფ ერდოღანი აირჩიეს", — აღნიშნა მან.
  • მისივე თქმით, 192 214 საარჩევნო ყუთიდან ამ დროისთვის 191 758 გაიხსნა, თუმცა დანარჩენი ხმები შედეგებზე გავლენას ვეღარ მოახდენს.
  • ახლანდელი მონაცემებით, კანდიდატებს შორის სხვაობა 2 მილიონზე მეტი ხმაა.
  • ამ გამოსვლამდე რამდენიმე წუთით ადრე, ერდოღანმა თავი გამარჯვებულად გამოაცხადა და მხარდამჭერებს მადლობა გადაუხადა.
  • ქილიჩდაროღლუმ კი თქვა, რომ ქვეყანაში დემოკრატიისთვის ბრძოლას გააგრძელებს.

მილოცვები: ოფიციალური შედეგებამდე ერდოღანმა არაერთი მილოცვა მიიღო — ამ სიაში ერთ-ერთი პირველები იყვნენ, საქართველოსა და უნგრეთის პრემიერმინისტრები, რუსეთის, აზერბაიჯანის, ვენესუელას და ირანის პრეზიდენტები.

  • ვლადიმერ პუტინმა მისალოც ტექსტში ერდოღანს ძვირფასი მეგობარი უწოდა და განაცხადა, რომ გამარჯვება იმის მტკიცებულებაა, თურქი ხალხი აფასებს მის თავდაუზოგავ მუშაობას და დამოუკიდებელ საგარეო პოლიტიკას.
  • ირაკლი ღარიბაშვილმა კი ტვიტერზე დაწერა, რომ ულოცავს საქართველოს დიდ მეგობარს, თურქეთის ლიდერად ხელახლა არჩევას.
  • "თურქმა ხალხმა თავისი აზრი დააფიქსირა და ჩვენ ვუერთდებით მათ დღესასწაულს. ჩვენ მზად ვართ კიდევ უფრო გავაძლიეროთ მეგობრობისა და სტრატეგიული პარტნიორობის კავშირები თურქეთსა და საქართველოს შორის", — ვკითხულობთ ღარიბაშვილის პოსტში.
  • ერდოღანს უკვე მიულოცა უკრაინის პრეზიდენტმაც და სამომავლო პარტნიორობის გაძლიერების იმედი გამოთქვა.
  • მან მილოცვები მიიღო ბრაზილიის, შვედეთის, საფრანგეთისა და ეგვიპტის ლიდერებისგანაც.
  • "საფრანგეთსა და თურქეთს ერთად დიდი გამოწვევები აქვთ. მშვიდობის დაბრუნება ევროპაში, ჩვენი ევროატლანტიკური ალიანსის მომავალი, ხმელთაშუა ზღვა. პრეზიდენტ ერდოღანთან ერთად, რომელსაც ვულოცავ ხელახლა არჩევას, ჩვენ გავაგრძელებთ წინსვლას", — დაწერა ემანუელ მაკრონმა.