ნაციონალურმა მოძრაობამ ზაალ უდუმაშვილი მერობის კანდიდატად მეტეხის ეზოდან წარადგინა. უდუმაშვილი კანდიდატად ოფიციალურად რამდენიმე წუთის წინ დასახელდა.

პარტიის ლიდერის, ნიკა მელიას თქმით, პირი, რომელიც თბილისის მერი გახდება ანგარიშვალდებული უნდა იყოს ხალხის წინაშე და არა რომელიმე პოლიტიკური პარტიის მიმართ.

"მეგობრებო, კაცს, რომელსაც მე წარმოგიდგენთ უკვე არის გამარჯვებული. წლების განმავლობაშ მან არაერთხელ გაიმარჯვა. გაიმარჯვა როგორც ჟურნალისტმა, გაიმარჯვა როგორც პროფესიონალმა, გაიმარჯვა, როგორც მოქალაქემ და ბოლოს, როგორც მოგეხსენებათ ის ხალხთან ერთად იცავდა თავისუფალ სიტყვას და ამ უთანასწორო ბრძოლაშიც გაიმარჯვა. ის მრავალჯერ იყო გამარჯვებული წარსულში, მაგრამ მთავარი გამარჯვება წინ არის, - ასე წარადგინა ნაციონალური მოძრაობის ლიდერმა, ნიკა მელიამ ზაალ უდუმაშვილი.

დღესვე ცნობილი გახდა რომ ნიკა მელია თბილისის საკრებულოს წევრებისთვის იბრძოლებს, ის საკრებულოს თავმჯდომარეობას გეგმავს.

რამდენიმე დღის წინ, 19 ივნისს უდუმაშვილი 9-საათიანი კურიერის დასრულებისას მაყურებელს დაემშვიდობა.

"ეს არის ჩემი ბოლო მიმართვა მაყურებლისადმი, როგორც კურიერის წამყვანის, დღეს მე ვამთავრებ 25 წლიან სატელევიზიო კარიერას ვასრულებ, თუმცა თქვენთან ურთიერთობას არა ეკრანიდან, არამედ უშუალო ურთიერთობით განვაგრძობ" - ასე დაემშვიდობა უდუმაშვილი მაყურებელს.