ინფორმაციას დედაქალაქის მთავრობა ავრცელებს.

რატომ არის მნიშვნელოვანი: თბილისის მერია აპირებდა, 50 მილიონ ევრომდე ღირებულების ვაგონები რუსული კომპანიისგან, მეტროვაგონმაშისგან შეეძინა.

  • ტენდერი თავდაპირველად ევროპის რეკონსტრუქციისა და განვითარების ბანკმა (EBRD-მა) შეაჩერა, რომელიც თბილისის მეტროს განახლების პროექტს ახორციელებს, თუმცა მოგვიანებით ხელშეკრულებაში ცვლილებები შევიდა და რუსულ კომპანიასთან კონტრაქტი ამოქმედდა.
  • თბილისის მერის მოადგილე ირწმუნებოდა, რომ ასეთ დაბალ ფასად სხვა მომწოდებლისგან ვაგონების შეძენას ვერ შეძლებდნენ და შეცვლილ ხელშეკრულებაში ქართული მხარის ფინანსური რისკები მაქსიმალურად დაზღვეული იყო.

დეტალები: მერიის ინფორმაციით, მეტროვაგონმაშთან დადებული ხელშეკრულების გაუქმების პროცედურა დაიწყო.

  • "19 მაისს, ჩვენი საერთაშორისო პარტნიორების მხრიდან მოხდა აღნიშნული კომპანიის სანქცირება. საქართველო ახორციელებს საერთაშორისო ფინანსური სანქციების აღსრულებას. შესაბამისად, თბილისის მუნიციპალიტეტი არ აპირებს სანქცირებულ კომპანიასთან თანამშრომლობას", — ნათქვამია განცხადებაში.