რატომ არის მნიშვნელოვანი: რუსულმა ავიაკომპანიამ საქართველოში ფრენების შესრულებისთვის აუცილებელი ნებართვა სამოქალაქო ავიაციის სააგენტოს მიერ 15 მაისს მიიღო.

  • კომპანია, რომელიც საქართველოში 17 მაისიდან კვირაში შვიდჯერ იფრენს, უკრაინამ 2022 წლის მაისში დაასანქცირა.
  • მიზეზი ომი იყო — დოკუმენტში ნათქვამია, რომ კომპანია ოპერირებს რუსეთის მთავრობისთვის სტრატეგიული მნიშვნელობის სექტორებში.
  • უზრუნველყოფს მაღალ მატერიალურ (ტრანსპორტი, ლოჯისტიკა და სხვა) მხარდაჭერას იმ ქმედებებისთვის, რომლებიც ძირს უთხრის ან საფრთხეს უქმნის უკრაინის ტერიტორიულ მთლიანობას, სუვერენიტეტსა და დამოუკიდებლობას.
  • სამოქალაქო ავიაციის სააგენტოს ინფორმაციით, ავიაკომპანია Azimuth Airlines ევროკავშირის შავ სიაში არაა.
  • ავიაკომპანიის საიტზე რეგისტრაციისას, ქვეყნის მითითებისას ასარჩევ ჩამონათვალში რუსეთის მიერ ოკუპირებული საქართველოს ტერიტორიები, აფხაზეთი და სამხრეთ ოსეთი, დამოუკიდებელ სახელმწიფოებადაა შეყვანილი.
  • კრიტიკის შემდეგ კომპანიამ ოკუპირებული ტერიტორიები ქვეყნების სიიდან ამოიღო.

დეტალები: ამის შემდეგ რუსმა დეპუტატმა მოითხოვა, რომ პროკურატურას შეესწავლა აზიმუტის ეს გადაწყვეტილება, თუ რატომ მოხდა სარეგისტრაციო გრაფიდან აფხაზეთისა და სამხრეთ ოსეთის ამოღება.

  • მოგვიანებით კომპანიამ სარეგისტრაციო ფორმიდან ქვეყნის გრაფა სრულად ამოიღო.
  • რეგისტრაციისას შესაძლებელია დოკუმენტის ან პირადი ნომრის ჩაწერა ისე, რომ არ მიუთითო საბუთის გამცემი ქვეყანა.