ამის შესახებ მამუკა მდინარაძემ უმრავლესობის სხდომის დასრულების შემდეგ გამართულ ბრიფინგზე განაცხადა.

რატომ არის მნიშვნელოვანი: ქართული ოცნების ინიციატივით, ცენტრალური საარჩევნო კოდექსის დაკომპლექტების წესი იცვლება.

  • მმართველ პარტიას სურს, ცესკოს თავმჯდომარეობის კანდიდატების წარდგენის უფლებამოსილება პრეზიდენტის ნაცვლად, პარლამენტის თავმჯდომარეს მიენიჭოს, ასევე, იცვლება მათ არჩევასთან დაკავშირებული პროცედურა და კვორუმი.
  • კანონპროექტის ინიციატორები მამუკა მდინარაძე, გივი მიქანაძე, დავით მათიკაშვილი, რატი იონათამიშვილი და ირაკლი შატაკიშვილი არიან.
  • ცვლილებების დამტკიცების შემთხვევაში, წარდგენილ კანდიდატებს თანამდებობაზე სრული ვადით, 5 წლით პარლამენტი სრული შემადგენლობის უმრავლესობით აირჩევს, მაშინ, როცა დღეს ამისთვის დეპუტატების 2/3-ის მხარდაჭერაა საჭირო.
  • ასევე, ცესკოს არაუმეტეს 9 წევრს პარტიები დანიშნავენ.
  • დღეს საარჩევნო კოდექსსა და პარლამენტის რეგლამენტში შესატანი ცვლილებების პროექტები კომიტეტზე პირველი მოსმენით განიხილეს და მხარი დაუჭირეს.

დეტალები: მამუკა მდინარაძის თქმით, მათ ოპოზიციასთან შეთავაზება აქვთ — ოპოზიციაში შემავალ თითოეულ პოლიტიკურ სუბიექტს სთავაზობენ, წარმოადგინონ მცირე, მოკლე დასაბუთებით მათთვის მისაღები კანდიდატები ხვალინდელი დღის განმავლობაში.

  • მისივე თქმით, წარმოდგენილი კანდიდატებიდან 15-მდე კანდიდატი აკმაყოფილებს როგორც კომპეტენციის, კომპეტენტურობის, ასევე კეთილსინდისიერების კრიტერიუმებს.
  • "რაც კარგად გამოჩნდა, მათ შორის, მათთან გასაუბრების დროს, რომელიც გაიმართა პარლამენტში. ეს ჩვენ საშუალებას მოგვცემს, განვსაზღვროთ, არის თუ არა პრაქტიკული შანსი, ამ საკითხზე მიღწეულ იქნას კონსენსუსი", — თქვა მდინარაძემ.
  • ამბობს, რომ თუ დადებითი შედეგი იქნება, მაშინ ისინი კიდევ დაჩქარებული წესით იზრუნებენ, რომ კენჭისყრა მოხდეს.
  • "უმრავლესობის გადაწყვეტილებით, ჩვენ ხვალ ველოდებით მათი მხრიდან კონკრეტულ ადამიანებთან, კონკრეტულ კანდიდატებთან დაკავშირებულ პოზიციას, მოკლე დასაბუთებას, რატომ არის მათთვის მისაღები, რატომ დაუჭერენ კონკრეტულ ადამიანებს მხარს", — თქვა მან.
  • განმარტა, რომ შედეგების შესახებ, არის თუ არა თანხვედრა, კონსენსუსის, შანსი — ამასთან დაკავშირებით, დღის ბოლომდე საზოგადოებას საქმის კურსში ჩააყენებენ.