რატომ არის მნიშვნელოვანი: დღეს თურქეთში საპარლამენტო და საპრეზიდენტო არჩევნები იმართება.

  • ქვეყანა ისტორიული არჩევანის წინაშე დგას: პრეზიდენტობის ორი ძირითადი კანდიდატი განვითარების მკვეთრად განსხვავებულ გზებზე საუბრობს.
  • მოსალოდნელია, რომ არჩევნები განსაზღვრავს ქვეყნის როლს ნატოს ალიანსში, მის ურთიერთობას აშშ-თან, ევროკავშირთან და რუსეთთან, მიგრაციის პოლიტიკას, ანკარას როლს უკრაინის ომში და სხვა მნიშვნელოვან უსაფრთხოების ასპექტებს.

ძირითადი კანდიდატები: მოქმედი პრეზიდენტის მთავარი კონკურენტი, ოპოზიციური სპექტრის საერთო კანდიდატი ქემალ ქილიჩდაროღლუა, მეტსახელად "თურქი განდი".

  • ის მთავარ ოპოზიციურ რესპუბლიკურ სახალხო პარტიას (CHP) ხელმძღვანელობს და წინასწარი გამოკითხვებით, რეჯეფ თაიფ ერდოღანთან შედარებით მცირე უპირატესობა ჰქონდა.

  • მას სურს თურქეთი ევროკავშირში გაწევრიანების პროცესს დაუბრუნოს და აშშ-თან სამხედრო კავშირები აღადგინოს.

  • მიუხედავად იმისა, რომ თურქეთი ნატოს თავდაცვითი ალიანსის ნაწილია, ერდოღანის დროს ქვეყანას მჭიდრო კავშირები აქვს ჩინეთთან და რუსეთთან.

  • ქილიჩდაროღლუ კი ირწმუნება, რომ მისი გამარჯვების შემთხვევაში თურქეთში საპარლამენტო მმართველობა იქნება, სადაც პარლამენტი და პრემიერმინისტრი უფლება-მოვალეობებს გაინაწილებენ.
  • 20-წლიანი მმართველობის შემდეგ ერდოღანი თურქეთს ექვსი მილიონი სამუშაო ადგილის შექმნას და მრავალმხრივ განვითარებას ჰპირდება.

წინასწარი შედეგები: დღეს არჩევნებზე მაღალი აქტივობა დაფიქსირდა. ადგილიდან გავრცელებულ ფოტოებში ჩანდა, რომ საარჩევნო უბნებთან რიგებში ასეულობით ადამიანი იდგა.

  • უბნები თურქეთის დროით 5 საათზე დაიხურა, წინასწარი შედეგების გამოქვეყნება კი რამდენიმე წუთის წინ დაიწყეს.
  • როგორც Aljazeera წერს, სახელმწიფო საინფორმაციო სააგენტო Anadolu-ს მონაცემების მიხედვით, რომლის ვებგვერდი ამ დროისთვის მიუწვდომელია, დათვლილია ხმების 51,03% და ერდოღანი 52%-ით ლიდერობს, ქილიჩდაროღლუს კი 42,1% აქვს.
  • ერდოღანის მხარდამჭერებმა ამ მონაცემების საფუძველზე უკვე აღნიშვნა დაიწყეს, თუმცა თურქეთის დედაქალაქის მერმა, მანსურ იავასმა თქვა, რომ ანადოლუს "არ აქვს სანდოობა" და რეალურად ოპოზიციის კანდიდატი ლიდერობს.
  • თავად ქილიჩდაროღლუმ ტვიტერზე დაწერა — "ჩვენ წინ ვართ" — რაც პარტიამაც გადააზიარა.
  • როგორც BBC წერს, კერძო საინფორმაციო სააგენტოს ანქას მონაცემებით, ხმათა 31,3% არის დათვლილი და ქილიჩდაროღლუ 47,4%-ით ლიდერობს, ერდოღანს კი 46,8% აქვს.
  • HaberTurk-ის მონაცემებით კი, დათვლილია ხმების 88,32% და ერდოღანს 51,96% აქვს, ქილიჩდაროღლუს — 42,19%.
  • ოფიციალური შედეგი სამ დღეში გასაჯაროვდება.
  • თუ ვერც ერთი კანდიდატი ვერ მოიპოვებს ხმების 50%-ზე მეტს, მეორე ტური 28 მაისს გაიმართება.