ამის შესახებ განცხადება დავით უსუფაშვილმა პარლამენტის პლენარულ სხდომაზე გააკეთა.

რატომ არის მნიშვნელოვანი: აშშ-ის სახელმწიფო დეპარტამენტმა გავლენიანი ქართველი მოსამართლეები, ე.წ კლანის წევრები, ლევან მურუსიძე, მიხეილ ჩინჩალაძე, ირაკლი შენგელია და ვალერიან ცერცვაძე "მნიშვნელოვან კორუფციულ საქმიანობაში ჩართულობის გამო" დაასანქცირა.

  • სახდეპის განცხადებით, ქართველმა მოსამართლეებმა ბოროტად გამოიყენეს თანამდებობა, როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა.
  • ოპოზიცია ითხოვს, შეიქმნას საგამოძიებო კომისია, რომლის მიზანიც სასამართლო სისტემაში არსებული კორუფციული ფაქტებისა და სამართალდარღვევების შესწავლა იქნება.
  • ქართულმა ოცნებამ, მოსამართლეების სოლიდარობის ნიშნად, კვორუმისთვის რეგისტრაცია არ გაიარა და საგამოძიებო კომისიის შექმნისთვის კენჭისყრა სამჯერ ჩაშალა.

დეტალები: ლელოს დეპუტატის თქმით, კენჭისყრის განზრახ ჩაგდება ქართული ოცნების მხრიდან უპრეცედენტო ადმინისტრაციული ძალადობაა.

  • "ჩვენ გაახლებთ 50 პარლამენტის წევრის ხელმოწერას, ანუ ხელმოწერით ვადასტურებთ ჩვენს ნებას და გადაწყვეტილებას იმის თაობაზე, რომ შეიქმნას საქართველოს კონსტიტუციის 42-ე მუხლით გათვალისწინებული საგამოძიებო კომისია", — უთხრა მან პარლამენტის თავმჯდომარეს.
  • უსუფაშვილის თქმით, თუ მმართველი გუნდისთვის ესეც არ იქნება საკმარისი, ოპოზიცია საკონსტიტუციო სასამართლოს მიმართავს.
  • "საგამოძიებო კომისია აუცილებლად შეიქმნება, ამ პარლამენტში თუ არა, შემდგომ პარლამენტში, რათა, ყველაფერთან ერთად, რაც ხდება მართლმსაჯულებაში, გამოძიებული და სააშკარაოზე გამოტანილი იყოს ისიც, რაც მოხდა ამ დღეებში პარლამენტში. მაშინ, როდესაც არა მარტო დღის წესრიგიდან წაშალეთ ჩვენი საკითხი, არამედ კონსტიტუცია წაშალეთ. ამის პატიება არ შეიძლება".

შალვა პაპუაშვილმა უსუფაშვილს კონსტიტუციის ის ვერსია დაუწუნა, რომელიც დეპუტატს სიტყვით გამოსვლისას ხელში ეჭირა.

  • "თუ არ ვცდები, საბავშვო კონსტიტუციაა, რაც გიჭირავთ. თქვენს მანდატს და თქვენს ქვეყანას უფრო სერიოზულად თუ მიუდგებით, ვიდრე საბავშვო კონსტიტუციის დონეზე, ვფიქრობ, თქვენც მიხვდებით, სად უნდა იდგეთ და თქვენი კოლეგებიც მიხვდებიან", — თქვა მან.