ამ თემაზე კახა კალაძემ თბილისის მთავრობის სხდომაზე ისაუბრა.

რატომ არის მნიშვნელოვანი: 18-მეტრიან ავტობუსებს თბილისის მერია მოსახლეობას მესამე წელია, ჰპირდება.

  • დედაქალაქის მთავრობაში ამბობენ, რომ სწორედ ეს ავტობუსები და მათთვის განკუთვნილი დერეფნები მოაგვარებს თბილისში არსებულ მგზავრთა გადაყვანის პრობლემას.

დეტალები: კალაძე ისევ ამბობს, რომ გადაწყვიტეს, შეისყიდონ 18-მეტრიანი ავტობუსები.

  • მისივე თქმით, ამ მიზნით გამოცხადებულია ბაზრის კვლევა, რომელიც 27 აპრილს დასრულდება.
  • "ბაზრის კვლევის შედეგების შესაბამისად, კონსოლიდირებული ტენდერის გამოცხადება დაგეგმილია მაისის დასაწყისში", — ამბობს თბილისის მერი.
  • პირველ ეტაპზე დედაქალაქის მთავრობა 160 ერთეულ 18-მეტრიან ავტობუსს შეიძენს, რისთვისაც, კალაძის თქმით, ბიუჯეტიდან, დაახლოებით, 245 მილიონი ლარი გამოიყოფა.

ავტობუსების ბაზა: მერიაში ამბობენ, რომ თბილისის აეროპორტის მიმდებარე ტერიტორიაზე ავტობაზის პროექტირება-მშენებლობაზე ტენდერი უკვე გამოცხადებულია.

  • "ტენდერი დასრულდება 8 მაისს. პროექტის სავარაუდო ღირებულება შეადგენს 62 მილიონ ლარს, დღგ-ის ჩათვლით. ტენდერში გამარჯვებულმა კომპანიამ ხელშეკრულების ხელმოწერიდან არაუმეტეს 10 თვის ვადაში უნდა მოაწყოს არანაკლებ 50 ერთეული 18-მეტრიანი ავტობუსის ექსპლუატაციისთვის საჭირო ავტობაზის ინფრასტრუქტურა", — ამბობს კალაძე.
  • მერის ინფორმაციით, ავტობაზის მშენებლობა 2024 წლის ბოლომდე უნდა დასრულდეს.