სიახლეებს გენერალური შტაბი, სხვადასხვა დანაყოფები და უკრაინული მედიები ავრცელებენ.

რატომ არის მნიშვნელოვანი: გასულ წელს უკრაინამ წარმატებული კონტრშეტევა განახორციელა და რუსული ძალები კიევიდან ჩრდილო-აღმოსავლეთის, ასევე, სამხრეთით, ხერსონის რეგიონის ტერიტორიებზე დაამარცხა.

  • ოკუპანტები კვლავ იკავებენ აღმოსავლეთის, სტრატეგიულად მნიშვნელოვანი სამხრეთისა და ყირიმის ნახევარკუნძულის ნაწილებს.
  • პრეზიდენტი ვოლოდიმირ ზელენსკი ამბობს, რომ სურთ მათი მიწის ყოველი სანტიმეტრი დაიბრუნონ რუსეთისგან, რომელმაც ცალმხრივად გამოაცხადა უკრაინის ხუთი რეგიონი საკუთარ შემადგენლობაში.
  • ბოლო თვეების განმავლობაში ბახმუტის მიმართულებაზე სასტიკი ბრძოლები მიმდინარებს, თუმცა არაერთი წინასწარი განცხადების მიუხედავად, ოკუპანტებმა ქალაქის ალყაში მოქცევა ამ დრომდე ვერ შეძლეს.

დეტალები: 21 აპრილის საღამოს და ღამით რუსეთმა სამხრეთ-აღმოსავლეთიდან და ჩრდილოეთიდან უკრაინას ირანული დრონებით შეუტია.

  • ამ თავდასხმას ენერგოსისტემა არ დაუზიანებია, თუმცა, ორმა შაჰედმა ნავთობის საცავები დააზიანა და ათასობით ტონა საწვავი დაიკარგა.
  • გენერალურ შტაბში ამბობენ, რომ უკრაინის შეიარაღებულმა ძალებმა გასული დღის განმავლობაში ოთხი მიმართულებით დამპყრობლების 53 თავდასხმა მოიგერიეს.
  • ვოლინისა და პოლესკის მიმართულებებში ოპერატიული ვითარება მნიშვნელოვნად არ შეცვლილა.
  • ომის კვლევის ინსტიტუტი წერს, რომ რუსეთის ჯარებმა განაგრძეს შეტევა ბახმუტის რაიონში და დაწინაურდნენ დუბოვო-ვასილოვკას დასავლეთით, ხოლო ვაგნერელებმა, სავარაუდოდ, დაიპყრეს ბახმუტ-2 სარკინიგზო სადგური ქალაქის ცენტრში.
  • ტაურიდის მიმართულების თავდაცვის ძალების სპიკერმა განაცხადა, რომ მტერმა უჰლედარზე ზეწოლა შეამცირა, მაგრამ ავდიივკა-მარინკას მიმართულებაზე ისევ რთული სიტუაციაა.

გარდა ამისა, დღეს გავრცელებული ინფორმაციებით შეგვიძლია ვივარაუდოთ, რომ ოკუპანტებსაც არ აქვთ მშვიდი დღე.

  • მელიტოპოლის მერის განცხადებით, შაბათს დილით, ოკუპირებულ ქალაქში აფეთქების ხმა იყო, თუმცა დამატებითი დეტალები უცნობია.
  • ოკუპირებული ყირიმის დე-ფაქტო ხელმძღვანელმა კი თქვა, რომ დღეს საჰაერო თავდაცვის სისტემები ამოქმედდა, მაგრამ მსხვერპლი არ ჰყავთ.
  • როგორც უკრაინსკა პრავდა წერს, რუსეთის კურსკის ოლქის გუბერნატორმა რომან სტაროვოიტმა განაცხადა სავარაუდო დაბომბვის შესახებ უკრაინის მხრიდან.