სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა სამსახურებრივი უფლებამოსილების ბოროტად გამოყენების, სამსახურებრივი მდგომარეობის გამოყენებით თაღლითობაში დახმარების და წინასწარი შეთანხმებით, ჯგუფის მიერ დიდი ოდენობით თაღლითობის ბრალდებით ოთხი საჯარო მოხელე დააკავეს. დაკავების შესახებ ინფორმაციას უწყების პრესსამსახური ავრცელებს.

დაკავებულები საჯარო მოხელეები არიან:

  • თიანეთის მუნიციპალიტეტის გამგებლის ყოფილი პირველი მოადგილე - მამული მამულაშვილი;
  • თიანეთის მუნიციპალიტეტის გამგეობის ინფრასტრუქტურის განვითარების, სივრცითი მოწყობის, არქიტექტურის და ზედამხედველობის სამსახურის მთავარი სპეციალისტი - მალხაზ მათურელი;
  • ამავე მუნიციპალიტეტის გამგებლის წარმომადგენელი ახალსოფლის ადმინისტრაციულ ერთეულში - ბადრი ჯიმშიტაშვილი;
  • ამავე მუნიციპალიტეტის გამგებლის წარმომადგენელი ნაქალაქარის ადმინისტრაციულ ერთეულში - ლია დორეული.

გარდა ამისა, ამავე საქმეზე დააკავეს შპს ნიკარემსტროის ფილიალი საქართველოს დირექტორი - მალხაზ ლომსაძე და შპს რაზას დირექტორის მოვალეობის შემსრულებელი - ზაზა ჩიტიშვილი.

გამოძიების ინფორმაციით, საჯარო მოხელეებმა ბოროტად გამოიყენეს სამსახურებრივი უფლებამოსილება და კომპანიების მხრიდან შეუსრულებელი სამუშაოს მიუხედავად, ხელი მოაწერეს საბავშვო ბაღების სარეაბილიტაციო-სარემონტო სამუშაოების საბოლოო შესრულებული სამუშაოების აქტებს. სუს-ში ამბობენ, რომ შესრულებულ სამუშაოებსა და გადარიცხულ თანხას შორის სხვაობა 123 240 ლარია.

გამოძიება სამსახურებრივი უფლებამოსილების ბოროტად გამოყენების, სამსახურებრივი მდგომარეობის გამოყენებით თაღლითობაში დახმარების და წინასწარი შეთანხმებით, ჯგუფის მიერ დიდი ოდენობით თაღლითობის საქმეზე მიმდინარეობს. ბრალის დამტკიცების შემთხვევაში, დაკავებულებს თავისუფლების აღკვეთას ექვსიდან ცხრა წლამდე ვადით ემუქრებათ.