პარლამენტმა შაბათის ფორმულას ჟურნალისტისა და ოპერატორს 1 თვის ვადით აკრედიტაცია შეუჩერა.

რატომ არის მნიშვნელოვანი: 6 თებერვალს პარლამენტის თავმჯდომარის, შალვა პაპუაშვილის მიერ გაცემული ბრძანებით, მედიას ახალი შეზღუდვები დაუწესდა.

  • ბრძანებით, მედიის წარმომადგენლებს ევალებათ კონკრეტული "ქცევის წესების დაცვა", მათ შორის, ერთ-ერთი კი პარლამენტის წევრის, აპარატის თანამშრომლის ან პარლამენტში სტუმრად მყოფი პირის მიერ უარი შემთხვევაში, ინტერვიუს შეწყვეტაა.
  • სწორედ ამ ქვეპუნქტის დარღვევას ედავებიან ფორმულას გადამღებ ჯგუფს.

დეტალები: მედიაომბუდსმენი პარლამენტის მიერ აკრედიტაციის შეჩერების პრაქტიკას მედიაზე პოლიტიკური ანგარიშსწორების ბერკეტად აფასებს.

  • "აკრედიტაციის წესი არღვევს მედიის წარმომადგენლების და საზოგადოების უფლებას მიიღოს და გაავრცელოს ინფორმაცია საკანონმდებლო ორგანოში მიმდინარე პოლიტიკური პროცესების შესახებ", — აღნიშნულია მედიაომბუდსმენის განცხადებაში.

ქარტიის განცხადებით, მედიის აკრედიტაციის ახალი წესი ზღუდავს ინფორმაციის მოპოვებისა და გავრცელების შესაძლებლობას.

  • ორგანიზაცია კიდევ ერთხელ აღნიშნავს, რომ იმ ფონზე, როდესაც მედიისთვის ფაქტობრივად შეუძლებელია საჯარო ინფორმაციის მიღება და მმართველი პარტიის წარმომადგენლები შერჩევითად აძლევენ ინტერვიუს მედიასაშუალებებს, მსგავსი რეგულაციები რიგი მედიასაშუალებებისთვის შეუძლებელს ხდის ინფორმაციის მოპოვებასა და საზოგადოებისთვის მიწოდებას.
  • ქარტია მოუწოდებს საქართველოს პარლამენტის თავმჯდომარეს, არ დაუშვას, რომ საფრთხე შეექმნას დემოკრატიის ისეთ პრინციპებს, როგორიცაა ანგარიშვალდებულება, საჯაროობა, ღიაობა და გააუქმოს მიღებული ბრძანება, რომელიც გამოიწვევს ფორმალურ დაბრკოლებებს და საქმიანობის შეზღუდვას მედიისთვის.