რატომ არის მნიშვნელოვანი: მმართველმა გუნდმა პალიტრა მედიის დისკრედიტაციის კამპანია რამდენიმე დღის წინ წამოიწყო.

  • 27 მარტს ერთ-ერთ პროპაგანდისტულ ვებგვერდზე განთავსდა სტატია, თითქოს მედიასაშუალებას კეზერაშვილი აფინანსებს.
  • მეორე დღეს ირაკლი კობახიძემ თქვა, რომ ამის შესახებ ინფორმაცია არ აქვს ან შეიძლება, ჰქონდეს და დეტალებში ვერ შევა, მაგრამ ამას ხელი არ შეუშლია, პალიტრას თავს დასხმოდა.
  • მედიის დისკრედიტაცია სცადა და თქვა, რომ ბოლო 2-3 თვის განმავლობაში ის ძალიან დაემსგავსა კეზერაშვილის სხვა ტელევიზიას, ფორმულას.
  • ქართული ოცნება ოპოზიციური ტელევიზიის დამფუძნებელს, დავით კეზერაშვილს ხშირად იყენებს კრიტიკულ მედიაზე თავდასხმის საშუალებად.

დეტალები: კობახიძე ამჯერადაც იმის მტკიცებაშია, რომ პალიტრა მედია ფორმულა 2 გახდა, თუმცა მტკიცებულებები ისევ არ აქვს.

  • "მე არ მაქვს მტკიცებულებებით გამყარებული ინფორმაცია, მაგრამ თუ გადავხედავთ ამ ჰოლდინგის პროგრამის შინაარსსა და მის ცვლილებას გასული 3 თვის განმავლობაში, აშკარად ჩანს, რომ გარკვეული ცვლილებები აშკარად განხორციელებულია დაფინანსების ნაწილში", — თქვა მან.
  • ქართული ოცნების თავმჯდომარე ამბობს, რომ მედიასაშუალება ადრე ნეიტრალური, ზომიერი და დაბალანსებული იყო, თუმცა დღეს ოპოზიციურ ტელევიზიას დაემსგავსა.
  • "დაემსგავსა კეზერაშვილის ტელევიზია ფორმულას და განსხვავება მათ შორის არ არის. ეს ამყარებს ეჭვს, რომ აქ ურევია კეზერაშვილის სისხლიანი ფული", — ირწმუნება კობახიძე.

რას ამბობს პალიტრა მედია: მათი განცხადებით, ცრუ ინფორმაცია სოციალურ მედიაში ტროლ-ბოტებმა გაავრცელეს, შემდეგ კი კომენტარები პოლიტიკური ლიდერების მხრიდანაც გაკეთდა.

  • ამბობენ, რომ ეს არის ცილისწამება და სიცრუე — "თავისი არსებობის 28 წლის განმავლობაში, მიუხედავად არაერთი მცდელობისა, პალიტრა მედია არ მოქცეულა რომელიმე პოლიტიკური ჯგუფის გავლენის ქვეშ. არ მიუღია, არ იღებს და არც მომავალში აპირებს, რომ მიიღოს მათგან დაფინანსება. განსაკუთრებით, აბსურდულია ბრალდება კეზერაშვილის და პალიტრა მედიის რაიმე კავშირის შესახებ";
  • "პალიტრა მედიის ყველა ორგანიზაციის და, მათ შორის, ტელეკომპანია პალიტრანიუსის ყველა შემოსავალი და ხარჯი გამჭვირვალეა და ხელმისაწვდომია კომუნიკაციების ეროვნული კომისიისთვის და ნებისმიერი დაინტერესებული პირისთვის".

რას ამბობს ქარტია: ორგანიზაცია მოუწოდებს მმართველ გუნდს, შეწყვიტოს მისგან დამოუკიდებელ მედიასაშუალებებზე ზეწოლა.

  • ქარტია ხაზს უსვამს, რომ ეს არ არის პირველი შემთხვევა, როდესაც მმართველი პარტიის წარმომადგენელი მისგან დამოუკიდებელ მედიასაშუალებას მისთვის მიუღებელი შინაარსის გამო თავს დაესხა.
  • ქარტია მიიჩნევს, რომ განვითარებადი დემოკრატიის ქვეყანაში, როგორიც საქართველოა, მნიშვნელოვანია მედია პლურალიზმის, გამოხატვის თავისუფლების მაღალი სტანდარტისა და ხელისუფლების გავლენებისგან თავისუფალი მედიასაშუალებების არსებობა.
  • "საქართველოს ხელისუფლებამ უნდა შეწყვიტოს აზრის, სიტყვისა და გამოხატვის თავისუფლების წინააღმდეგ მოქმედება და მისგან დამოუკიდებელ მედიასაშუალებებზე ზეწოლა";
  • "საზოგადოებას განვუმარტავთ, რომ მაუწყებლების მფლობელების შესახებ ინფორმაცია ხელმისაწვდომია საჯარო რეესტრში, ხოლო დაფინანსებასთან დაკავშირებული ინფორმაციის მოძიება შესაძლებელია საქართველოს კომუნიკაციების ეროვნული კომისიის ვებგვერდზე";
  • ქარტია მოუწოდებს მმართველი პარტიის წარმომადგენლებს, განცხადების გაკეთებამდე გადაამოწმონ ინფორმაცია ღია წყაროების მეშვეობით.