ამის შესახებ ინფორმაციას საერთაშორისო გამჭვირვალობა — საქართველო ავრცელებს.

რატომ არის მნიშვნელოვანი: TI-ის ცნობით, ქართული ოცნებიდან ფორმალურად წასული და პრორუსული ხალხის ძალის დეპუტატის, ვიქტორ ჯაფარიძის ცოლის ძმის, ალეკო ხვისტანის კომპანია შპს ელექტრო მონტაჟ სერვისი სახელმწიფო შესყიდვებს იღებს.

• მათივე თქმით, ალეკო ხვისტანი მმართველი პარტიის შემწირველი და ელექტრო მონტაჟ სერვისის დირექტორია, 50% მეწილე მაია ჭელიძეა, ხოლო ხვისტანების ოჯახი კომპანიას 2015 წლიდან ფლობს.
• ელექტრო მონტაჟ სერვისმა 2011 წლიდან დღემდე ელექტრონული ტენდერებიდან და გამარტივებული შესყიდვებიდან 34,655,073 ლარის ხელშეკრულებები მიიღო.
• აქედან 6,549,941 ლარის ღირებულების 6 ტენდერში კომპანიამ მას შემდეგ გაიმარჯვა, რაც ალეკო ხვისტანი კომპანიის წილის მფლობელი გახდა, შემდგომში მან ეს წილი ცოლს დაუთმო, თავად კი დირექტორი გახდა.
• TI-ის ცნობით, ვიქტორ ჯაფარიძის ნათესავების გამოჩენის შემდეგ, კომპანია საიდუმლო შესყიდვებშიც მონაწილეობს.
• "მართალია შესყიდვების სააგენტოს ვებგვერდზე არ არის განთავსებული არც საიდუმლო ტენდერის საბოლოო ღირებულება და არც ხელშეკრულება, თუმცა ელექტრო მონტაჟ სერვისს მომსახურების ღირებულებად ჯამში 13,077,076 ლარი აქვს შეთავაზებული", — წერს ორგანიზაცია.

დეტალები: TI-ის ცნობით, კომპანიაში ვიქტორ ჯაფარიძის ნათესავების გამოჩენის შემდეგ ელექტრო მონტაჟ სერვისმა საქართველოს თავდაცვის სამინისტროსა და სახელმწიფო უსაფრთხოების სამსახურის საიდუმლო შესყიდვებში დაიწყო მონაწილეობა.

• "აღსანიშნავია, რომ ვიქტორ ჯაფარიძის შვილი ოთარ ჯაფარიძე, ჩვენი ინფორმაციით, 2022 წლის მაისამდე სწორედ სახელმწიფო უსაფრთხოების სამსახურის თანამშრომელი იყო, შემდეგ ეროვნული უსაფრთხოების საბჭოს აპარატში დასაქმდა, ამჟამად კი კვლავ სახელმწიფო უსაფრთხოების სამსახურში მუშაობს", — ამბობს ორგანიზაცია.
• ამბობენ, რომ კომპანიამ 2017 წელს თავდაცვის სამინისტროს ორ საიდუმლო შესყიდვაში გაიმარჯვა, შესყიდვების სააგენტოს ვებგვერდზე არ ჩანს ამ ორი ტენდერის ხელშეკრულების საბოლოო ღირებულება, თუმცა კომპანიის მიერ შეთავაზებული მომსახურების ფასი 2,017,789 ლარი იყო.
• მათივე ცნობით, 2017-2019 წლებში ელექტრო მონტაჟ სერვისმა მონაწილეობა მიიღო სახელმწიფო უსაფრთხოების სამსახურის 5 საიდუმლო შესყიდვაში.
• ხუთიდან სამ შემთხვევაში კომპანიას კონკურენტი არ ჰყოლია, ორჯერ კი კონკურენტთან შედარებით დაბალი თანხა შესთავაზა, ჯამურად შეთავაზებული ფასების მოცულობამ 11,059,287 ლარი შეადგინა.
• "სახელმწიფო შესყიდვების სააგენტოს ვებგვერდზე ხუთივე ტენდერის სტატუსი შეჩერებულია ეტაპზე: "წინადადებების მიღება დასრულებულია" და აღარ იკითხება შემდგომი პროცედურები. შესაბამისად უცნობია, საბოლოოდ მიიღო თუ არა ხელშეკრულებები კომპანიამ, თუმცა სავარაუდოა, რომ ხუთივე შემთხვევაში სამუშაოები ელექტრო მონტაჟ სერვისმა შეასრულა", — წერს TI.

პოლიტიკური შემოწირულებები: ორგანიზაციის თქმით, ალეკო ხვისტანი და ელექტრო სერვის მოტაჟის 50% წილის მფლობელი ბონდო ომიანიძე მსხვილი პოლიტიკური შემწირველიც არიან, მათ ჯამში 230,000 ლარის შეწირულება აქვთ გაღებული.

• ალეკო ხვისტანმა 2014-2020 წლებში, პარტიას ქართული ოცნება-დემოკრატიული საქართველო ჯამში 110,000 ლარი შესწირა.
• ბონდო ომიანიძემ 2018 წელს პრეზიდენტობის კანდიდატს, სალომე ზურაბიშვილს 60,000 ლარი, 2020 წელს კი პარტია ქართულ ოცნებას 60,000 ლარი შესწირა.

დასკვნა და რეკომენდაციები: საერთაშორისო გამჭვირვალობა-საქართველოს შეფასებით, ელექტრო სერვის მონტაჟის ჩართულობა სახელმწიფო შესყიდვებში კითხვის ნიშნებს აჩენს.

• "მოვუწოდებთ ანტიკორუფციულ სააგენტოს, შეისწავლოს ელექტრო მონტაჟ სერვისის მონაწილეობა შესყიდვებში და დაადგინოს, შეიცავს თუ არა კორუფციის შესაძლო ნიშნებს", — წერს TI.