რა ხდება: 21 მარტს ფეისბუქ მომხმარებელმა, ნუგზარ სულა სულაშვილმა სოციალურ ქსელში გაავრცელა მიმოწერის სქრინი, სადაც, მისივე თქმით, ქართული ოცნების დეპუტატი, დიმიტრი სამხარაძე სიცოცხლის მოსპობით ემუქრება.

  • "დაგმარხავ მაგ ევროპაში, მოგაკითხავს ჩემი ხალხი... ისეთ რამეს გაგიჩალიჩებ, შენი ხელით მოგაკვლევინებ თავს", — ვკითხულობთ შეტყობინებაში.
  • მოქალაქე ამბობს, რომ ქართველ სამართალდამცველებთან თანამშრომლობის აზრს ვერ ხედავს, ამიტომ აპირებს, სამხარაძის წინააღმდეგ საფრანგეთის საგამოძიებო უწყებას მიმართოს.

დეპუტატი უარყოფს ხსენებულ მიმოწერას და სულაშვილის პოსტს დისკრიმინაციული და ჰომოფობიური შინაარსის განცხადებით ეხმაურება.

  • "ტექსტიც ან ქალის დაწერილია, ან გეის", — წერს ის.
  • სამხარაძის თქმით, სულაშვილს მისი სახელითა და ყალბი ექაუნთით მიწერეს — "როდის იყო მესინჯერში ვინმესთვის რამე მიმიწერია, გამორთული მაქვს, იდიოტებო".
  • ის ამ მოვლენების უკანაც ნაციონალურ მოძრაობას ხედავს და ამბობს, რომ შეიძლება, ოპოზიციურმა პარტიამ მუქარაც აღასრულოს, რათა ყველაფერი ქართულ ოცნებას დაბრალდეს.

დიმიტრი სამხარაძე, რომელსაც ფეისბუქ გვერდზე პროფილის ფოტოდ პარტიის დამფუძნებლის, ბიძინა ივანიშვილის სურათი უყენია, ლანძღვა-გინებით გამორჩეული დეპუტატია.

  • 2021 წლის 3 ივლისს მან მმართველი პარტიის ოფისთან მისულ აქციის მონაწილეებს აგინა — ოფისს სპეცდანიშნულების რაზმები და ათეულობით პოლიციელი იცავდა, როდესაც სამხარაძე აივნიდან გადმოდგა, უწყვეტი გინება დაიწყო, ეს გადაიღო და ფეისბუქზე ატვირთა.
  • ის ერთადერთი იყო, ვინც 10 მარტს პარლამენტში რუსული კანონის ჩაგდებას მხარი არ დაუჭირა, თუმცა მალევე მოუწია, თავისი სიტყვები უკან წაეღო და ემტკიცებინა, რომ ყველაფერი ტექნიკური ხარვეზის გამო მოხდა.
  • ამ მოვლენების შემდეგ დეპუტატი კიდევ უფრო გააქტიურდა და რუსული კანონის მოწინააღმდეგეთა დისკრედიტაციის კამპანიაში ჩაერთო.
  • "ვითომ გაიმარჯვეს, ვითომ ჩვენ შეგვაშინეს, ვითომ არ გადაგივლით! ვითომ გაპატიებთ! ვითომ შეგრჩებათ. დაგჭმუჭნით", — იმუქრებოდა ის.

დეტალები: ირაკლი კობახიძე ამბობს, რომ სამხარაძის პოზიცია მისთვის აბსოლუტურად გასაგებია.

  • "დიტო სამხარაძეს აქვს თავისი დამოკიდებულება ნაც. მოძრაობისადმი, რასაც აქვს კონკრეტული საფუძველი, კონკრეტული მიზეზი და ეს საფუძველი და მიზეზი მე აბსოლუტურად მესმის", — თქვა მან.