განცხადებას ფრანკლინის კლუბი ფეისბუქგვერდზე აქვეყნებს.

რატომ არის მნიშვნელოვანი: რუსული კანონის საწინააღმდეგო აქციის დასრულების შემდეგ მმართველ გუნდში ახალი მესიჯბოქსი გაჩნდა, რომელიც სტუდენტების დისკრედიტაციას ისახავდა მიზნად.

  • მათი ერთ-ერთი სამიზნე საქართველოს უნივერსიტეტში შექმნილი ფრანკლინის კლუბი გახდა.
  • 12 მარტს, იმედის ეთერში ირაკლი ღარიბაშვილმა თქვა, რომ ფრანკლინის კლუბში ახალგაზრდებს "წამლავენ" და "ტვინს ურეცხავენ".
  • სტუდენტების წინააღმდეგ ამ პროპაგანდისტულ კამპანიას შეუერთდნენ სხვებიც, მათ შორის, ირაკლი კობახიძეც, რომელმაც თქვა, რომ სტუდენტების მობილიზაცია, როგორც UG-ს, ასევე, თავისუფალი უნივერსიტეტის ბაზაზე ხდება.

ფრანკლინის კლუბი წერს, რომ ბოლო პერიოდში ხელისუფლებისა და სახელისუფლებო მედიების უპრეცედენტო, ცილისმწამლებლური პროპაგანდისტული კამპანიის სამიზნეები გახდნენ.

  • გარდა იმისა, რომ უსაფუძვლო ბრალდებები გააჟღერეს მმართველი პარტიის გავლენიანმა პირებმა, აღნიშნავენ, რომ ამ კამპანიას ხელისუფლება აქტიურად იყენებს საქართველოს უნივერსიტეტზე უსამართლო თავდასხმებისთვის.
  • "ამის გათვალისწინებით, ფრანკლინის კლუბმა მიიღო რთული, მაგრამ არსებულ მდგომარეობაში ერთადერთი სწორი გადაწყვეტილება, შეწყვიტოს თანამშრომლობა საქართველოს უნივერსიტეტთან და ამით თავიდან აარიდოს ყალბ ინფორმაციაზე დაფუძნებული ნეგატიური საინფორმაციო კამპანია".

დეტალები: აღნიშნავენ, რომ დღეს საქართველოს უნივერსიტეტი სახელისუფლებო პროპაგანდის კონტროლის მიღმა დარჩენილი ერთ-ერთი თავისუფალი სივრცეა, რომლის არსებობაც ქვეყანაში დემოკრატიის გადარჩენისთვის მნიშვნელოვანია.

  • "ხაზს ვუსვამთ, რომ ფრანკლინის კლუბის თანამშრომლობა საქართველოს უნივერსიტეტთან ატარებდა წმინდად საგანმანათლებლო ხასიათს. უნივერსიტეტის ხელმძღვანელობა არასოდეს ჩარეულა ფრანკლინის კლუბის, როგორც არასამთავრობო ორგანიზაციის მართვასა თუ საქმიანობის შინაარსში".
  • ამბობენ, რომ დაფუძნების დღიდან ფრანკლინის კლუბი დემოკრატიული ღირებულებებისა და კლასიკოს ლიბერალ მოაზროვნეთა იდეების გავრცელებას ემსახურება.
  • "ჩვენს მისიად რჩება საქართველოს სამოქალაქო საზოგადოების გაძლიერება და ქვეყნის ევროპული და ევროატლანტიკური ინტეგრაციის ხელშეწყობა".
  • "ვამაყობთ აკადემიის თითოეული კურსდამთავრებულით, რომელთა რაოდენობა უკვე ორ ათასს აღემატება. გვსურს, უდიდესი მადლობა გადავუხადოთ საქართველოს უნივერსიტეტს, რომლის მხარდაჭერის გარეშეც ფრანკლინის აკადემიას ვერ შევქმნიდით".
  • "მოგიწოდებთ, შემოგვიერთდეთ ფრანკლინის კლუბის ისტორიის ახალ ეტაპზე. დღეს თქვენი მხარდაჭერა ჩვენთვის უმნიშვნელოვანესია, რადგანაც მკაფიოდ ვგრძნობთ, რომ ერთად, შეგვიძლია, არამარტო გავუძლოთ პროპაგანდის ზეწოლას, არამედ შევიტანოთ მნიშვნელოვანი წვლილი ჩვენი ქვეყნის განვითარებასა და ევროპულ, ევროატლანტიკურ ინტეგრაციაში. ერთად დავიცვათ თავისუფლების იდეა და მივაღწიოთ ევროპულ მომავალს", — წერენ ისინი.