ამის შესახებ ჯანდაცვის მინისტრმა ჟურნალისტებთან ისაუბრა.

რატომ არის მნიშვნელოვანი: ნოდარ მელაძის შაბათის ინფორმაციით, პარტიიდან რამდენიმე დეპუტატი გეგმავს წასვლას, ნაწილს კი რუსული კანონის მხარდაჭერაზე უარის გამო გაუშვებენ.

  • ამას წინ უძღოდა ბორჯომში საპარლამენტო უმრავლესობისა და მთავრობის გასვლითი შეხვედრა, სადაც, როგორც პარტიაში თქვეს, "მნიშვნელოვანი პოლიტიკური საკითხები იყო განხილული". ასევე, "ისაუბრეს პარლამენტისა და მთავრობის სამომავლო სამუშაო გეგმებზე".
  • პარტიის გავრცელებულ კადრებში არ ჩანდა რამდენიმე მინისტრი და დეპუტატი, სკამების ნაწილი კი ცარიელი იყო.
  • TV პირველის წყაროს ინფორმაციით, შეხვედრაზე სამთავრობო ცვლილებების საკითხი წყდებოდა.

დეტალები: ზურაბ აზარაშვილი ამბობს, რომ სპეკულაციები მისი თანამდებობიდან წასვლის შესახებ იმ რეფორმებს უკავშირდება, რომელიც ფარმაცევტულ ბაზარს შეეხო.

  • "რასაკვირველია მესმის, რომ ძალიან მძიმეა და დაურეგულირებელი ბაზარი გაცილებით მეტ შესაძლებლობებს იძლეოდა, მაგრამ სამწუხაროდ, ეს, საბოლოო ჯამში, გვაძლევდა იმ მიუღებელ ხარისხს, რაც იყო სამედიცინო სექტორში და ასევე ფარმაცევტულ პროდუქციაზე, საკმაოდ დიდ ფასებს", — თქვა აზარაშვილმა.
  • ამბობს, რომ პრემიერმინისტრსაც კითხეს, იგეგმებოდა თუ არა ცვლილებები და ტოვებდა თუ არა თანამდებობას, მაგრამ ღარიბაშვილმაც დაადასტურა, რომ ასეთი ცვლილებები არ იგეგმება.
  • "საქმე რაც არის ჩვენი მოსახლეობის კეთილდღეობისკენ მიმართული, ამას მივიყვანთ ბოლომდე", — თქვა ჯანდაცვის მინისტრმა.