როგორც On.ge-ს მერიაში განუცხადეს, კომპანიამ ახალი განაცხადი უნდა წარმოადგინოს.

რატომ არის მნიშვნელოვანი: თბილისის მერია ყოფილი აბრეშუმის ფაბრიკასა და ლაგუნა ვერეს საცურაო აუზის მიმდებარე ტერიტორიაზე მრავალფუნქციური კომპლექსის მშენებლობას გეგმავს.

  • კერძო პირს თბილისის ისტორიული ნაწილის განაშენიანების რეგულირების ზონაში ორი, 48 და 60-სართულიანი ცათამბჯენის აშენება უნდა.
  • 25 იანვარს მთავრობის სხდომაზე თბილისის მერმა, კახა კალაძემ განაცხადა, რომ ლაგუნა ვერეს ტერიტორია მუნიციპალიტეტს საკუთრებაში გადაეცა, რისთვისაც ბიძინა ივანიშვილსა და ფონდ ქართუს მადლობა გადაუხადა.
  • მანვე თქვა, რომ პროექტი "ძალიან მაგარი" იქნება და დედაქალაქში მიზიდულობის ახალი ცენტრი გაჩნდება.
  • NGO სექტორის განცხადებით, პროექტი შეიცავს ქალაქის ისტორიული ნაწილის განადგურებისა და სატრანსპორტო გამტარუნარიანობის კიდევ უფრო გართულების საფრთხეებს.
  • მათივე თქმით, მერმა პროექტის იდეა ისე მოიწონა, რომ წარმოდგენილი და განხილული არ ყოფილა კანონით გათვალისწინებული აუცილებელი კვლევები.

დეტალები: თბილისის მერიაში ამბობენ, რომ განაშენიანების რეგულირების გეგმის მომზადებაზე სამუშაო პროცესი მიმდინარეობს.

  • "როგორც ყველა სხვა შემთხვევაში, ხშირად ხდება მერიის მხრიდან ხარვეზის დადგენა, შემსრულებლის მიერ მისი გამოსწორება და ხელახლა წარმოდგენა. მოცემულ შემთხვევაშიც კომპანია პროექტის დოკუმენტაციის სრულყოფის მიზნით ახალ განაცხადს წარმოადგენს და ძველს მსვლელობა აღარ მიეცემა".