შინაგან საქმეთა სამინისტრო 21 წლის ქალის ცემასთან დაკავშირებით გამოძიება სისხლის სამართლის კოდექსის 126-ე მუხლის პირველი ნაწილით დაიწყო, რაც ძალადობას გულისხმობს.

21 წლის ქალის ცემაზე შსს ვიდეოსა და განცხადებას ავრცელებს და აღნიშნავს, რომ 15 ივნისს პოლიცია ვარდების მოედნის მიმდებარედ მას შემდეგ გამოცხადდა, რაც მოქალაქეების ჩხუბზე შევიდა ინფორმაცია. შსს დასძენს, რომ ადგილზე ნასვამ მდგომარეობაში მყოფი დაზარალებული დახვდათ, რომელსაც სხეულზე სხვადასხვა სახის დაზიანება უკვე აღენიშნებოდა:

"პოლიციელების დანახვისას ი.ლ. აგრესიული გახდა, სამართალდამცველებს სიტყვიერი შეურაცხყოფა მიაყენა, მათთან თანამშრომლობასა და სამედიცინო დახმარების გამოძახებაზე უარი განაცხადა".

შსს-ში განმარტავენ, რომ პოლიციის თანამშრომლებმა დაზარალებული ქალი წვრილმანი ხულიგნობისა და სამართალდამცველის კანონიერი მოთხოვნისადმი დაუმორჩილებლობის ბრალდებით დააკავეს.

"ადვოკატის პოლიციის განყოფილებაში მისვლის შემდეგ ი.ლ.-მ განაცხადა, რომ იგი მის კოლეგა ქალბატონს არ უცემია, არამედ დაზიანებები სხეულზე სამართალდამცველებმა მიაყენეს. ი.ლ. ამჯერად სამედიცინო დახმარებაზე დათანხმდა, რის შემდეგაც იგი სასწრაფო სამედიცინო დახმარების ბრიგადამ ა. ალადაშვილის სახელობის კლინიკაში გადაიყვანა, სადაც მას შესაბამისი სამედიცინო გამოკვლევები უტარდება".

დღეს თანასწორობის მოძრაობის წარმომადგენელმა 21 წლის ქალის ცემაზე ფეისბუკზე ინფორმაცია გაავრცელა, დაზარალებულის თქმით, ის დილის ხუთ საათზე ძველი თბილისის პოლიციის მე-7 განყოფილების უფროსმა და ამავე განყოფილების კიდევ ორმა პოლიციელმა სცემა.

დაზარალებული საავადმყოფოში იმყოფება და გავრცელებული ინფორმაციის მიხედვით, მას თავის ტვინის შერყევა აღენიშნება. 21 წლის ქალის ინტერესებს იურისტი ნინო ბოლქვაძე იცავს.