რატომ არის მნიშვნელოვანი: მოქალაქეები, პოლიტიკოსები, სხვადასხვა სფეროს წარმომადგენლები პარლამენტთან დილიდან, ბიუროს სხდომის პარალელურად, შეიკრიბნენ, თუმცა როდესაც ადგილის დატოვება დაიწყეს, უმრავლესობამ რუსული კანონის განხილვა, 9 მარტის ნაცვლად, დღესვე გადაწყვიტა.

  • მაშინვე დაიგეგმა მეორე აქცია, რომელიც ახლაც გრძელდება — გადაკეტილია რუსთაველის გამზირი.
  • ახლა საკანონმდებლო ორგანოსთან შეკრებილები რუსულ კანონს აპროტესტებენ, რომელსაც მხარი 76-მა დეპუტატმა დაუჭირა, 13 კი მის წინააღმდეგ წავიდა.

დეტალები: ადამიანებს, რომლებსაც ჩიტაძის ქუჩაზე დროშა ჰქონდათ გაშლილი, წყლის ჭავლს უმიზნებდნენ, ამის შემდეგ მათ წინააღმდეგ ცრემლსადენი გაზი გამოიყენეს.

  • ამის მიუხედავად, მოქალაქეები რუსული კანონის წინააღმდეგ პროტესტს არ წყვეტენ.
  • მანამდე აქციის მონაწილეების დაშლა სამართალდამცველებმა, სავარაუდოდ, წიწაკის სპრეითაც სცადეს.
  • შსს ამტკიცებდა, რომ აქციამ ძალადობრივი ხასიათი მიიღო და მოქალაქეებს აფრთხილებდა, რომ მათ მიმართ გამოყენებული იქნებოდა "კანონით გათვალისწინებული ძალა".
  • სწორედ ამას მოჰყვა მშვიდობიანი მოქალაქეების წყლის ჭავლით დარბევა.