ბათუმში ჩამოსვლამდე ამერიკულმა მუსიკალურმა ჯგუფმა Maroon 5-მა კონცერტი მოსკოვში გამართა.

დიდი სცენის გარდა ადამ ლევინმა სალომე კინწურაშვილისა და სამველ კარაპეტიანის ქორწილშიც იმღერა.

ახალდაქორწინებულების მეგობრები საღამოდან ვიდეოებს ინსტაგრამზე აქვეყნებენ.

რუსეთის დედაქალაქს ბენდი 3 ივნისს ესტუმრა, მანამდე კი Maroon 5-მა ჩრდილოეთ კაროლინაში დაგეგმილი ორი კონცერტი გააუქმა, რისი მიზეზიც ანტი-ლგბტ კანონი გახდა.

კანონის მიხედვით, მოქალაქეები ვალდებულნი არიან გამოიყენონ იმ სქესის შესაბამისი საზოგადოებრივი ტუალეტები, რა სქესიც მათ დაბადების მოწმობაში აქვთ მითითებული.

შეზღუდვა ტრანსგენდერ ხალხს, ვისაც არ აქვს შეცვლილი დაბადების მოწმობა, ართმევს საშუალებას, ისარგებლონ თავიანთი გენდერული იდენტობის შესაბამისი ტუალეტებით, რადგან ჩრდილოეთ კაროლინაში, დაბადების მოწმობაში სქესის ჩანაწერის შეცვლა მხოლოდ მათ შეუძლიათ, ვისაც სქესი ქირურგიული ჩარევის გზით აქვთ შეცვლილი.

Maroon 5 გააკრიტიკეს გადაწყვეტილების გამო, ჩრდილო კაროლინის გუბერნატორის თქმით, მათი საქციელი "თვალთმაქცობაა", რადგან ისინი მოსკოვში კონცერტებს არ აუქმებენ.

"ჯგუფი 3 ივნისს მოსკოვში დაუკრავს, სადაც ერთნაირსქესიანთა ქორწინება არალეგალურია. 5 ივნისს ისინი ბუქარესტში იქნებიან, სადაც ქვეყანა ერთნაირსქესიანთა კავშირს არ აღიარებს, 7 ივნისს კი ბათუმში, სადაც ქორწინება განსაზღვრულია როგორც ქალისა და მამაკაცის კავშირი" - წერს Washington Times.

Maroon 5 პროექტ Check in Georgia-ს ფარგლებში ბათუმს 7 ივნისს ეწვევა.