ლევან იოსელიანი, რომელიც სახალხო დამცველად დღეს აირჩიეს, პარლამენტთან მიმდინარე აქციაზე მივიდა.

რატომ არის მნიშვნელოვანი: რუსთაველზე შეკრებილ დემონსტრანტებს, რომლებიც რუსულ კანონს აპროტესტებენ, სპეცრაზმის წევრები სპეციალური საშუალებების გამოყენებით, მათ შორის, სავარაუდოდ, წიწაკის სპრეისა და წყლის ჭავლის გამოყენებით შლიან.

  • დღეს არჩეულმა სახალხო დამცველმა, შსს-ს მოუწოდა, არ გამიყენონ არაპროპორციული ძალა და სპეციალური საშუალებები მშვიდობიანი მომიტინგეების წინააღმდეგ.
  • თუმცა, მან ჟურნალისტის კითხვაზე, ჰქონდა თუ არა აქციაზე ძალის გადამეტებას ადგილი, კონკრეტული პასუხი არ გაუცია.

დეტალები: ამ ფაქტმა აქციის მონაწილეების ნაწილში აგრესია გამოიწვია, ხოლო მეორე ნაწილი აგრესიულად მოქმედ ჯგუფს მოუწოდებდა, არ ეძალადათ დეპუტატსა და აწ უკვე სახალხო დამცველზე.

  • დემონსტრანტთა ნაწილმა მას სიტყვიერი და ფიზიკური შეურაცხყოფა მიაყენა, ესროდნენ კვერცხებს, ბოთლებს და ასხამდნენ წყალს.
  • დეპუტატს ასევე აგინებდნენ, და ეძახდნენ მონას.
  • ფიზიკური და სიტყვიერი ძალადობის მსხვერპლი გახდა ალეკო ელისაშვილიც, რომელიც იოსელიანს გამოესარჩლა.
  • ასევე, მისი გამორიდება აქციიდან გიორგი ბურჯანაძემაც სცადა.
  • დემონსტრანტები მშრალ ხიდამდე მისდევდნენ იოსელიანს და ელისაშვილს.
  • "ამ ქვეყანაში სხვადასხვა პოლიტიკური შეხედულების ადამიანები არიან. ჩემთვის პოლიტიკურ შეხედულებებს მნიშვნელობა არ აქვს. ვიღაცას მოვწონვარ, ვიღაცას – არა. მე ყველას სახალხო დამცველი ვარ და ვიქნები. არ ვიცი, რას მოჰყვა ასეთი რეაქცია. მე ჩემი უფლებამოსილება უნდა შევასრულო", — განაცხადა სახალხო დამცველმა.