საზმაუ ჩვენია - აქცია წითელი ზონისა და ინტერVIEW-ს მხარდასაჭერად 16 ივნისს, პარასკევს, 13 საათზე საზოგადოებრივი მაუწყებლის შენობასთან იგეგმება. აქციის ორგანიზატორი საზოგადოებრივი მაუწყებლიდან რამდენიმე თვის წინ გათავისუფლებული ჟურნალისტი, ლაშა მესხია.

"საზოგადოებრივი მაუწყებლის მენეჯმენტის გადაწყვეტილებით გადაცემები წითელი ზონა და ინტერVIEW დაიხურა. გადაცემების დახურვა და მაუწყებელში განსხვავებული აზრის დევნა დღეს არ დაწყებულა. ახალი მენეჯმენტის მოსვლიდან საზოგადოებრივ მაუწყებელში შიშმა და განუკითხაობამ დაისადგურა. საფრთხე შეექმნა 1 200-ზე მეტ დასაქმებულს, თუმცა მაშინ სამოქალაქო პროტესტის გამო ნეგატიური პროცესების შეფერხება მოხერხდა, თუმცა როგორც გაირკვა დროებით!," - აღნიშნულია აქციის საორგანიზაციო ჯგუფის მიერ გავრცელებულ განცხადებაში.

ამავე განცხადების მიხედვით, ივლისის თვეში საფრთხე სხვა გადაცემებთან ერთად მეორე არხსა და იქ დასაქმებულ ადამიანთა უმრავლესობას ელის.

"საზოგადოებრივი მაუწყებელი არის ხალხის ტელევიზია და არა რომელიმე პოლიტიკური ელიტის, შესაბამისად იმ გადაცემების დახურვა, რომელიც პოლიტიკური თუ სხვა საკითხების მიმართულებით იყო მწვავე და შეიცავდა ანალიზს საფრთხეს უქმნის არა მარტო რომელიმე დასაქმებულს, არამედ მაუწყებლის იდეას,"- ვკითხულობთ განცხადებაში.

როგორც 13 ივნისს On.ge-სთვის გახდა ცნობილი, საზოგადოებრივმა მაუწყებელმა რადიო თავისუფლებას გადაცემის ივლისის შუა რიცხვებიდან შეჩერების შესახებ წერილი მიწერა.

26 აპრილს საზოგადოებრივი მაუწყებლის მიმდინარე და ახალი ამბების ბლოკის დირექტორი, გიორგი გვიმრაძე ამბობდა, რომ რადიო თავისუფლებასთან ამ ორი გადაცემის ეთერში განთავსების საკითხზე მოლაპარაკებებს გეგმავდნენ.

საზოგადოებრივი მაუწყებლის მენეჯმენტის გადაწყვეტილებით, 17 ივლისიდან მოამბის გარდა, ყველა გადაცემა დაიხურება. როგორც დოკუმენტში წერია, ეთერში 2017 წლის სექტემბრიდან დაბრუნდება პროგრამული პრიორიტეტების შესაბამისად, კონკურსის წესით შერჩეული ახალი გადაცემები.