სამშენებლო კომპანია სვეტის დამფუძნებელი, გივი ჯიბლაძე ცდილობს თავი აარიდოს ბიზნეს-ვალდებულებას, - ამის შესახებ ჯიბლაძის გატაცების ბრალდებითა და თანხის გამოძალვისთვის დაკავებულების ლევან ჩქარეულისა და კახა ბახტაძის ადვოკატი, იოსებ ხარატიშვილი აცხადებს.

"როგორც ჩემი დაცვის ქვეშ მყოფები აღნიშნავენ იყო მხოლოდ და მხოლოდ ბიზნეს საქმიანობა, ამ ბიზნეს საქმიანობიდან გამომდინარე გარკვეული ვალდებულება ჰქონდა შესასრულებელი, მათ შორის ფინანსური, რასთან დაკავშირებითაც ხდებოდა აღნიშნული შეხვედრები. ამ ეტაპისთვის ვფიქრობთ, რომ არის პროვოცირებული გარკვეული მიზნების მისაღწევად," - განუცხადა ადვოკატმა რუსთავი 2-ს.

ჯიბლაძის გატაცების ბრალდებით ოთხი პირი 12 ივნისს თბილისში, აღმაშენებლის ხეივანში, მოსამართლის განჩინების საფუძველზე, ცენტრალურმა კრიმინალურმა პოლიციამ დააკავა. შემთხვევის შედეგად ამ ტერიტორიაზე გარკვეული პერიოდით შეფერხებული იყო საავტომობილო მოძრაობა.

შინაგან საქმეთა სამინისტროს ცნობით, გამოძიება სსკ-ის 143-ე და 181-ე მუხლებით მიმდინარეობს, რაც თავისუფლების უკანონო აღკვეთასა და გამოძალვას გულისხმობს.