ამის შესახებ ორგანიზაციის მიერ გავრცელებულ განცხადებაშია საუბარი.

რატომ არის მნიშვნელოვანი: გუშინ საგარეო და თავდაცვის კომიტეტებმა რუსულ კანონს მხარი დაუჭირეს, რასაც, პარალელურად, პარლამენტსა და მიმდებარე ტერიტორიაზე ჟურნალისტები და არასამთავრობო სექტორის წარმომადგენლები ვაპროტესტებდით.

  • კომიტეტების სხდომაზე არ შეგვიშვეს მედია, NGO-ები, კრიტიკულად განწყობილი დეპუტატები, თუმცა შეუშვეს ანტიდასავლური მოძრაობის, ხალხის ძალის წევრები და ქართულ ოცნებასთან აფილირებული ე.წ. უფლებადამცველები.
  • პოლიციამ დააპატიმრა აქციაზე მისული 36 ადამიანი, მედიის წარმომადგენლები და აქტივისტები — უმეტესად იმიტომ, რომ კონსტიტუციით მინიჭებული გამოხატვის თავისუფლებით სარგებლობდნენ და მონასა და მოღალატეებს იძახდნენ.
  • ხოლო მედიაზე, რომელიც პარლამენტში მიმდინარე პროცესებს აშუქებდა, იძალადეს — საკანონმდებლო ორგანოს ეზოდან ძალის გამოყენებით გამოაგდეს On.ge-ის მთავარი რედაქტორი, ნეტგაზეთის ჟურნალისტი და ფორმულას ფოტოგრაფი.
  • აქციაზე დააკავეს ტაბულას ჟურნალისტი, ბექა ჯიქურაშვილი და პუბლიკას დირექტორი, ზურა ვარდიაშვილი.
  • მუშაობისას დაშავდა TV პირველის ოპერატორი, რომელმაც შეტაკებების დროს მიიღო დაზიანებები და აღენიშნება ფეხისა და თავის ტრავმა.

დეტალები: DRI-ში ამბობენ, რომ სამართალდამცავებმა უხეშად დაარღვიეს და არაპროპორციულად შეზღუდეს რუსული კანონის წინააღმდეგ აქციის მონაწილეთა შეკრებისა და გამოხატვის უფლება.

  • ორგანიზაცია მოუწოდებს პარლამენტს, უარი თქვას "უცხოური გავლენის აგენტებზე" კანონის განხილვაზე.
  • შსს-ს კი მიმართავს, დარჩეს კანონის ფარგლებში და დაიცვას შეკრებისა და გამოხატვის თავისუფლება — "უარი თქვას ჟურნალისტური საქმიანობის შეუფერხებლად განხორციელებისთვის მიზანმიმართულად ხელის შეშლაზე".

გარდა ამისა, DRI მიმართავს სპეციალურ საგამოძიებო სამსახურს, დაუყოვნებლივ შეისწავლოს და სათანადოდ ირეაგიროს ჟურნალისტებისა და აქციის მონაწილეთა დაკავების ფაქტებზე, ასევე, შეამოწმოს სამართალდამცავების ქცევის კანონიერება.