მოქალაქეები, მედიის და არასამთავრობო სექტორის წარმომადგენლები და პოლიტიკოსები პარლამენტთან აქციას მართავენ, სადაც ხალხის ძალის მიერ ინიციირებულ რუსულ კანონპროექტს აპროტესტებენ.

რატომ არის მნიშვნელოვანი: პროტესტი ხმაურის ფონზე მიმდინარეობს, აქციაზე დააკავეს აქტივისტები.

  • ასევე, პარლამენტის ტერიტორიიდან გააძევეს მედიის წარმომადგენლები, რომლებიც იქ კანონიერად იმყოფებოდნენ.

  • აქციის მონაწილეების განცხადებით, დღეს საქართველოს პარლამენტში რუსული კანონპროექტის განხილვის დაწყება ნიშნავს დიდი რუსული კედლის მშენებლობას.

  • მათი შეფასებით, კანონპროექტისთვის მსვლელობის მიცემა ხელს შეუშლის ქართველი ხალხის მცდელობას, გააძლიერონ ერთმანეთი და გააძლიერონ ქვეყანა, ასევე, მტრულად წარმოაჩენს ქვეყნის მეგობრებს და აფერხებს ქვეყნის ევროატლანტიკურ განვითარებას.

დეტალები: აქციაზე მობილიზებულია შინაგან საქმეთა სამინისტროს თანამშრომლები.

  • შსს აქციის მონაწილეებს მოუწოდებს, არ გასცდნენ შეკრების და გამოხატვის თავისუფლების კანონით დასაშვებ ფარგლებს.
  • ხოლო აქციის ორგანიზატორებს აფრთხილებს, არ დაუშვან ძალადობისკენ მოწოდებები და უზრუნველყონ, რომ აქციამ არ მიიღოს ძალადობრივი ხასიათი.
  • "შინაგან საქმეთა სამინისტრო უზრუნველყოფს საზოგადოებრივი წესრიგის და უსაფრთხოების დაცვას. სამართალდარღვევის ფაქტებზე სამინისტრო ყველა შესაბამის ზომას მიმართავს და კანონის ფარგლებში სამართლებრივ რეაგირებას მოახდენს", — ნათქვამია უწყების მიერ გავრცელებულ განცხადებაში.