22 თებერვალს სულხან-საბა ორბელიანის უნივერსიტეტში ასოცირებული პროფესორის — ირმა გელანტია-ახვლედიანის წიგნის: "შიდა აუდიტის პოლიტიკა. ეფექტიანი საჯარო მმართველობისთვის საქართველოში" — პრეზენტაცია გაიმართა. ამ მიმართულებით ეს პირველი მონოგრაფიაა ქვეყანაში და ეფუძნება ავტორის სადისერტაციო ნაშრომს.

მონოგრაფიაში განხილულია შიდა აუდიტის როლი ეფექტიანი საჯარო მმართველობის პროცესში, შიდა აუდიტის სისტემის ფორმირება-განვითარების ეტაპები საქართველოში და შედარება შესაბამის საერთაშორისო პრაქტიკასთან. გამოკვეთილია გაუმჯობესების შესაძლებლობები კონკრეტული ნაბიჯების შეთავაზებით. როგორც ავტორი აღნიშნავს, ამ პროცესში მნიშვნელოვანია ქალების როლი: "უკეთესი საჯარო მმართველობა შესაძლებელია კეთილსინდისიერი, მაღალი პასუხისმგებლობითა და პროფესიონალი ქალებით გაჯერებული!"

"მთავარი ხაზი, რომელიც წიგნს მიჰყვება, არის დაგროვილ კითხვებზე პასუხები, თუ როგორ მიაღწიეს ევროკავშირის წევრმა ქვეყნებმა ეფექტიან მმართველობას, საბიუჯეტო სახსრების ყაირათიან განკარგვას, მოქალაქეთა კეთილდღეობას, რა გზა გაიარეს და როგორ შეგვიძლია ჩვენ გამოვიყენოთ საუკეთესო პრაქტიკა და გამოცდილება უკეთესი საჯარო მმართველობის მისაღებად" — აღნიშნა ირმა გელანტია-ახვლედიანმა.

როგორც სულხან-საბა ორბელიანის უნივერსიტეტის ბიზნესისა და ტექნოლოგიების ფაკულტეტის დეკანმა, თამთა მიქაბერიძემ განაცხადა, წიგნი თანაბრად საინტერესოა აღნიშნულ სფეროში დასაქმებული პირებისთვისა და აკადემიური სფეროს წარმომადგენლებისთვის: "იმის გათვალისწინებით, რომ შიდა აუდიტის მიმართულებით ჩვენს საგანმანათლებლო სივრცეში ლიტერატურა ქართულ ენაზე ძალიან მწირია, აღნიშნული სახელმძღვანელო უმნიშვნელოვანეს როლს ითამაშებს აკადემიურ სფეროში და არაერთი უნივერსიტეტის ბიბლიოთეკას გაამდიდრებს. წიგნში განხილული საკითხები, მიგნებები, რეკომენდაციები ძირითადად ავტორის 22-წლიან პროფესიულ გამოცდილებას ეფუძნება, რაც ცხადყოფს, რომ ამ სფეროში დასაქმებული ადამიანებისთვის, კერძო თუ საჯარო სექტორის წარმომადგენლებისთვისაც თანაბრად საინტერესო იქნება".

სულხან-საბა ორბელიანის უნივერსიტეტის ბიზნესისა და ტექნოლოგიების ფაკულტეტის პროფესორის, წიგნის რედაქტორის, ნინო პაპაჩაშვილის განმარტებით, კარგად ორგანიზებული შიდა აუდიტის გარეშე, შეუძლებელია სახელმწიფო აპარატის ეფექტიანი ფუნქციონირება: "წიგნი შინაარსობრივად ბევრი ასპექტით განიხილავს წარმატებული საჯარო პოლიტიკის წარმართვისთვის ინსტიტუციური უზრუნველყოფის საკითხებს, ამ თვალსაზრისით ღირებული შენაძენია, როგორც დარგობრივი ლიტერატურისთვის, ისე პროფესიული თვალსაზრისით".

წიგნის პრეზენტაციას კერძო და საჯარო სექტორში დასაქმებული პირები და აკადემიური სფეროს წარმომადგენლები ესწრებოდნენ.