ამის შესახებ დემოკრატიის კვლევის ინსტიტუტი განცხადებას ავრცელებს.

რატომ არის მნიშვნელოვანი: ორგანიზაციის განმარტებით, ევროკომისიის 12 რეკომენდაციის შესრულების ვადის ამოწურვის მოახლოებასთან ერთად, ქართული ოცნების ლიდერების რიტორიკაში გახშირდა ევროსკეპტიკური და ევროკავშირის სხვადასხვა ინსტიტუტის მიმართ უარყოფითი განცხადებები.

• ამბობენ, რომ თუ აქამდე ამ დამოკიდებულებით მხოლოდ საპარლამენტო უმრავლესობის ის წევრები გამოირჩეოდნენ, რომლებმაც ე.წ. ხალხის ძალის სახელით ინიღბებიან, ანალოგიური განცხადებები უკვე ღიად ისმის ქართული ოცნების თავმჯდომარისგან, თბილისის მერისგან და ფრაქციის დეპუტატებისგან.

დეტალები: მათი თქმით, ამ განცხადებებით „ქართული ოცნების“ ლიდერები ცდილობენ ევროკავშირის წევრობის კანდიდატის სტატუსი ვერ მიღება წარმოაჩინონ როგორც ერთი მხრივ, უმნიშვნელო, არაფრად ჩასაგდები მოვლენა და მეორე მხრივ, როგორც უსამართლო გადაწყვეტილება.

• "ქართული ოცნება ხშირად მიანიშნებს იმაზე, რომ საქართველოს, რომელიც რეალურად იმსახურებს კანდიდატობას, შესაძლოა ევროკავშირმა პოლიტიკური მოსაზრებებით არ მიანიჭოს საქართველოს კანდიდატის სტატუსი", — ნათქვამია განცხადებაში.
• DRI-ის თქმით, განცხადებების ეს ნაწილი განსაკუთრებით დემაგოგიურია, ვინაიდან ევროკავშირი, პირველ რიგში, სწორედ პოლიტიკური გაერთიანებაა.
• განმარტავენ, რომ ცალკეული სამართლებრივი თუ ეკონომიკური რეფორმების ჩატარება ევროკავშირის კანონმდებლობის შესაბამისად, ავტომატურად ვერ გახდება მისი წევრობის საფუძველი, თუ ქვეყანაში დემოკრატიული ინსტიტუტების განვითარება შეფერხებული და ერთპარტიული კონტროლის ქვეშაა.
• მათი თქმით, საქართველოს კონსტიტუციის 78-ე მუხლი მკაფიოდ განსაზღვრავს ქართველი ხალხის ნებას.
• ამიტომ ქართულ ოცნებას, მიუხედავად ხელისუფლებაში ყოფნისა, არ აქვს კონსტიტუციურ ჩანაწერში გაცხადებული სახალხო ნების შესაცვლელი ლეგიტიმაცია.
• რაც დაადასტურა 2022 წლის 20 ივნისს საქართველოს ევროპული ინტეგრაციის მხარდასაჭერ აქციაზე ათეულ ათასობით მოქალაქის შეკრებამაც.

დემოკრატიის კვლევის ინსტიტუტი მიიჩნევს, რომ ქართული ოცნების ლიდერების ანტიდასავლური რიტორიკის მიზანია, საზოგადოების ნეგატიური განწყობა მიმართოს ევროკავშირისკენ და არა მის მიერ მიღებული, ქვეყნის ევროპული მომავლის დამაზიანებელი გადაწყვეტილებებისკენ.

• რაც რეალურ საფრთხეს უქმნის ევროკავშირის კანდიდატი ქვეყნის სტატუსის მიღებას.
• ამბობენ, რომ აუცილებელია ხელისუფლებამ გააცნობიეროს, რომ საქართველოს მოქალაქეები თავიანთ მომავალს, საქართველოს განვითარებას ახლაც, განუხრელად უკავშირებენ ევროინტეგრაციას.
• მათი თქმით, ევროინტეგრაციის პროცესის შეფერხების შემთხვევაში, საქართველოს ხელისუფლება პოლიტიკურ პასუხისმგებლობას ვერ აირიდებს შეცდომაში შემყვანი საინფორმაციო კამპანიის დახმარებით.
• "საკუთარი უმოქმედობის სხვისთვის გადაბრალების ნაცვლად, ხელისუფლებამ ქართველი ხალხის ნების შესაბამისად, უნდა გადადგას ნაბიჯები პოლიტიკური პოლარიზაციის შესამცირებლად" — წერია განცხადებაში.