პროკურატურამ, გამოძიების ფარგლებში, Birja Mafia-ს წევრების, მიშკა მგალობლიშვილისა და გიორგი ქებურიას დაკითხვა დაიწყო. საქმე ეხება სამართალდამცავების მხრიდან, დაკავების დროს, ნარკოტიკული საშუალებების შესაძლო ჩადებას.

დაკითხვა რამდენიმე საათის წინ დაიწყოო, ამ ეტაპზე კი უცნობია დამთავრდა თუ არა მგალობლიშვილისა და ქებურიას დაკითხვა.

დღეს საქართველოს მთავარმა პროკურატურამ, ნარკოდანაშაულისთვის ბრალდებულების მიმართ შესაძლო კანონდარღვევების შესახებ, გამოძიების დაწყებაზე ინფორმაცია გაავრცელა. "საქმეზე გამოძიება სისხლის სამართლის კოდექსი" 3691 (სისხლის სამართლის საქმეზე მტკიცებულების ფალსიფიკაცია) და 333-ე (სამსახურებრივი უფლებამოსილების გადამეტება) მუხლებით დაიწყო.

ამავე განცხადებაში უწყება აღნიშნავდა, რომ Birja Mafia-ს წევრების მიმართ აღკვეთის ღონისძიებად პატიმრობას აღარ მოითხოვდა.

Birja Mafia-ს წევრები, გიორგი ქებურიასა და მიშკა მგალობლიშვილს თბილისის საქალაქო სასამართლომ წინასწარი პატიმრობა შეუფარდა. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს. ბრალის დამტკიცების შემთხვევაში რეპერებს 8-დან 20 წლამდე ან უვადო თავისუფლების აღკვეთა ემუქრებათ.