არხანგელსკის ჩრდილოეთ ფედერალური უნივერსიტეტის სტუდენტი უკვე ოფიციალურად დაემატა რუსეთის ტერორისტებისა და ექსტრემისტების ოფიციალურ სიას.

რატომ არის მნიშვნელოვანი: რუსეთის ხელისუფლება განსხვავებულ აზრს რეპრესიული კანონებით სჯის და აქტიურ მონიტორინგს უწევს საზოგადოებრივ აზრს, თუ რამდენად ტოტალური და ურყევია უკრაინაში შეჭრის გადაწყვეტილების მოწონება.

  • ამისთვის, კი ქვეყანაში დასმენის საბჭოთა მეთოდები გამოიყენება, კონტროლდება სოციალური მედია და ადამიანები აბსურდული ბრალდებებით ხვდებიან ციხეში.
  • მათ შორის, არსებობს კანონები სამხედროების შესახებ "ცრუ ინფორმაციის" გავრცელებისა და ჯარის "დისკრედიტაციის" წინააღმდეგ.

დეტალები: ოლესია კრივცოვა დააკავეს სოციალურ ქსელში ომის საწინააღმდეგო პოსტებისთვის.

  • 20 წლის ოლესია შინაპატიმრობაშია და პოლიცია მას ელექტრო სამაჯურით აკონტროლებს. კრივცოვას სახლიდან გასვლა მხოლოდ სასამართლო პროცესზე დასასწრებად შეუძლია. შინაპატიმრობის წესების თანახმად, მას ტელეფონზე საუბარი და ინტერნეტში შესვლა ეკრძალება .
  • ოლესია კრივცოვას ბრალი ედება ტერორიზმის გამართლებასა და რუსეთის შეიარაღებული ძალების დისკრედიტაციაში და 10 წლამდე პატიმრობა ემუქრება.
  • ერთ-ერთი ამბავი, რის გამოც მას შინაპატიმრობა შეეფარდა, გასული წლის ოქტომბერში ყირიმის ხიდზე აფეთქებას შეეხებოდა, სადაც იგი ამ ფაქტით უკრაინელების კმაყოფილებაზე ჰყვებოდა.
  • ამბის გამოქვეყნების შემდეგ, კრივცოვასთან სახლში პოლიციელები მივიდნენ, ტელეფონი წაართვეს და იატაკზე დაწოლა მოსთხოვეს.
  • "ვერასოდეს წარმოვიდგენდი, რომ ინტერნეტში რამის გამოქვეყნებისთვის ამხელა პატიმრობის მიღება შეიძლებოდა", — ამბობს სტუდენტი.