Inter RAO-სთან დავა 2017 წლიდან, მსოფლიო ბანკთან არსებულ საერთაშორისო საინვესტიციო დავების მოგვარების ცენტრში (ICSID-ში) მიმდინარეობდა.

რატომ არის მნიშვნელოვანი: რუსულ კომპანიასთან დავის საგანი ელექტროენერგიის ტარიფები იყო.

  • Inter RAO, რომელიც "თელასის" აქციათა 75%-ს ფლობს, ამტკიცებს, რომ საქართველომ შეთანხმების პირობები დაარღვია, ელექტროენერგიის ტარიფები არ გაზარდა და ლარის გაუფასურებით გამოწვეული ზარალი არ აუნაზღაურა, რის გამოც კომპანიას მილიონიანი ზარალი მიადგა.
  • იუსტიციის სამინისტრო ამბობდა, რომ მთავრობამ ტარიფები სახელმწიფოსა და საქართველოს მოქალაქეების ინტერესების შესაბამისად განსაზღვრა.

დეტალები: საქართველოს წინააღმდეგ საჩივარი Inter RAO-ს ორი ჰოლანდიური შვილობილი კომპანიის, GARDABANI HOLDINGS B.V.-ისა და SILK ROAD HOLDINGS B.V-ის სახელით იყო წარდგენილი.

  • გარდა ამისა, საქართველომ სტოკჰოლმის საარბიტრაჟო ტრიბუნალში Inter Rao-სთან მიმდინარე კიდევ ერთი პარალელური საინვესტიციო დავა წააგო.
  • ჯერჯერობით უცნობია, ამ ორი განაჩენიდან რომლის აღსრულება მოუწევს საქართველოს, რადგანაც ორივე დავის კომპენსაცია არ იკრიბება.

ენერგეტიკის მაშინდელი მინისტრი, კახა კალაძე ამბობს, რომ მის მიერ მიღებულმა გადაწყვეტილებამ საქართველო არათუ დააზარალა, არამედ თანხა დაუზოგა.

  • "ინტერ რაო" ითხოვდა, დაახლოებით, 200 მლნ დოლარს, რასაც ჩვენ არ ვეთანხმებოდით. წარმოგიდგენიათ, ხელი რომ მომეწერა, იმაზე, რომ მიეღო 200 მლნ დოლარი, რა მოხდებოდა და რას დამატეხდნენ თავს? შესაბამისად, მივიღეთ გადაწყვეტილება, ვფიქრობდით, რომ არ ეკუთვნოდა ამ კომპანიას 200 მილიონი და პირდაპირ ვუთხარით, რომ ვიდავებდით. მოხდა არბიტრაჟში განხილვა და დაგვეკისრა გაცილებით ნაკლები", — განაცხადა თბილისის მერმა.