ტელეკომპანია რუსთავი2-ის საკონტროლო პაკეტის მფლობელები, ძმები გია და ლევან ყარამანიშვილები აცხადებენ, რომ ნიკა გვარამიას შეუძლია არხზე გენერალურ დირექტორად მუშაობა გააგრძელოს. ამის შესახებ ყარამანიშვილებმა ერთობლივი განცხადება გაავრცელეს.

ყარამანიშვილების თქმით, ტელეკომპანიის დამფუძნებლებს გვარამია თანამდებობიდან არ გაუთავისუფლებიათ. მათი თქმით, მსგავსი ინფორმაციის გავრცელება ან არაინფორმირებულობის ბრალია, ან მიზანმიმართული სიცრუეა.

"სინამდვილეში, თათბირზე, რომელიც შეეხებოდა ტელეკომპანიაში დაგროვილ ფინანსურ პრობლემებს, ნიკა გვარამიამ თავად განაცხადა, რომ ტოვებდა თანამდებობას, რასაც დამსწრე დამფუძნებლის წინააღმდეგობა არ მოჰყოლია, როგორც არსებული ემოციური ფონის, ასევე იმის გამო, რომ ნიკა გვარამია თავად განიხილავდა წასვლის შესაძლებლობას, რის შესახებაც ვიცოდით, როგორც ჩვენ, ასევე ტელეკომპანიის თანამშრომლებმა, რომელთა წინაშეც ეს საჯაროდ იქნა გაცხადებული რამდენიმე კვირის წინ," - აღნიშნულია განცხადებაში.

ამავე განცხადების მიხედვით, რამდენიმე კვირის წინ არხის დამფუძნებლები და გენერალური დირექტორი კომპანიის ფინანსური კრიზისიდან გამოყვანის ერთობლივ გეგმაზე შეთანხმდნენ. ყარამანიშვილების თქმით, აუცილებელია გეგმის განუხრელად შესრულება, მენეჯმენტის ხარჯების ოპტიმიზაციისა და კონტროლის გზით, რათა დაუყოვნებლივ განახლდეს ხელფასების გაცემა და კომპანიის მიმდინარე ვალდებულებების შესრულება.

8 ივნისს On.ge-სთვის ცნობილი გახდა, რომ ნიკა გვარამიამ რუსთავი 2-ის გენერალური დირექტორის თაბამდებობა დატოვა.