რა ვითარებაა თურქეთსა და სირიაში

ორივე ქვეყანაში დაღუპულთა რიცხვი 37 ათასს აჭარბებს.

რატომ არის მნიშვნელოვანი: 7,8-ბალიანი დამანგრეველი მიწისძვრა თურქეთ-სირიის საზღვართან 6 თებერვალს მოხდა.

თურქეთისა და სირიის რამდენიმე ქალაქი თითქმის მთლიანად განადგურდა, ათასობით ადამიანი კი დაშავდა.
მოსალოდნელია, რომ ეს რიცხვი გაიზრდება, რადგან ნანგრევების გასუფთავება და სამაშველო სამუშოები ჯერ კიდევ გრძელდება.

თურქეთი: მაშველების განცხადებით, მიწისძვრიდან ერთ კვირაზე მეტი ხნის შემდეგაც კი, ნანგრევებიდან ადამიანების ხმები ისევ ისმის.

ბოლო მონაცემებით, თურქეთში 31 643 ადამიანის დაღუპვაა დადასტურებული.
ერდოღანის განცხადებით, ნანგრევებიდან ცოცხლად 8 000-ზე მეტი ადამიანი ამოიყვანეს, 81 000-ზე მეტი დაზარალებული კი, რომლებიც კლინიკებში მკურნალობდნენ, უკვე გაწერეს.
"თურქეთი არასდროს დაივიწყებს მეგობრობას, რომელიც თქვენ აჩვენეთ ამ ბნელ დღეებში", — თქვა მან და ქვეყნებს დახმარებისთვის მადლობა გადაუხადა.

სირია: 13 თებერვალს გაეროს მისიის ხელმძღვანელმა, ჩრდილოეთ სირიის ქალაქ, ალეპოში ვიზიტისას განაცხადა, რომ სამაშველო ფაზა დასრულებულია.

ბოლო მონაცემებით, დაღუპულია 5 700-ზე მეტი ადამიანი.
მისი თქმით, ახლა დაზარალებული ადამიანებისთვის ჰუმანიტარული დახმარების გაწევაა მნიშვნელოვანი.
"ამ ადამიანებისთვის თავშესაფრის უზრუნველყოფა, ფსიქოსოციალური ზრუნვა, ეს ჩვენი ვალდებულებაა ახლა".
საერთაშორისო დახმარება შეფერხებულად მიეწოდებათ მეამბოხეთა მიერ კონტროლირებად ნაწილებში — დაზარალებულებს ძნელად მიეწოდებათ საკვები და მედიკამენტები.

გაეროში ზუსტი რიცხვს ვერ ასახელებენ, თუმცა ამბობენ, რომ მიწისძვრას ორ ქვეყანაში რამდენიმე ათასი ბავშვი ემსხვერპლა.

UNICEF-ის ცნობით, დაშავდა 7 მილიონზე მეტი ბავშვი, მათგან 4,6 მილიონზე მეტი თურქეთის, ხოლო 2,5 მილიონზე მეტი კი სირიის მაცხოვრებელია.
გაეროში აცხადებენ, რომ მთავარ პრობლემად კვლავ წყლისა და სანიტარული საშუალებების ხელმისაწვდომობა რჩება.
"ბევრმა ოჯახმა დაკარგა სახლი და ახლა დროებით თავშესაფრებში ცხოვრობენ, ხშირად ყინვის პირობებში და მათ ტანჯვას თოვლი და წვიმა ემატება", — განაცხადა გაეროს წარმომადგენელმა.

ბოლო ამბები:

გირჩევთ