მრეწველობის პროფკავშირის, ლაბორის ცნობით, დღეს, დილის 9 საათიდან საირმე მინერალ ვოთერსის თანამშრომლები გაიფიცნენ.

რატომ არის მნიშვნელოვანი: გაფიცულები ღირსეულ სამუშაო პირობებსა და სამართლიან ანაზღაურებას ითხოვენ.

  • დასაქმებულთა თქმით, გაფიცვამდე 21-დღიანმა მედიაციის პროცესმა უშედეგოდ ჩაიარა.
  • მათი ცნობით, ამ ეტაპზე საწარმო პარალიზებულია და გაფიცულია ყველა თანამშრომელი.
  • მათივე თქმით, გაფიცვა უვადოა და გაგრძელდება მანამ, სანამ მოთხოვნები არ დაკმაყოფილდება.
  • On.ge დაუკავშირდა კომპანიას, სადაც გვითხრეს, რომ გაფიცვასთან დაკავშირებით განცხადებას რამდენიმე საათში გააკეთებენ.

დეტალები: დასაქმებულების მოთხოვნები მოიცავს:

  • ხელფასების 30%-ით ზრდას.
  • საქსტატის მონაცემების შესაბამისად ხელფასების ყოველწლიურ ინდექსაციას.
  • საპენსიო გადასახადის დამსაქმებლის მიერ დაფარვას.
  • ღირსეულ და უსაფრთხო შრომით პირობებს.
  • ქარხანაში არსებული ანტისანიტარიის მოწესრიგებას.

ამასთანავე, პროფკავშირის განცხადებაში გაჟღერებულია შემდეგი მოთხოვნები:

  • დამსაქმებლის მხრიდან შანტაჟისა და მუქარის აკრძალვა.
  • დამფუძნებელთან შეხვედრა.
  • მათი შეფასებით, მენეჯმენტის ბრალეულობის გამო, ქარხანა სრულფასოვნად ვერ ფუნქციონირებს და საჭიროა კოლექტიური შეთანხმება.
  • დასაქმებულები ამბობენ, რომ კომპანია ცდილობს თანამშრომლები ერთმანეთთან დააპირისპიროს და ისინი უცხო ქვეყნის მოქალაქეებით ჩაანაცვლოს.