თბილისის საქალაქო სასამართლოში, დაკავებული მიშკა მგალობლიშვილის აღმკვეთი ღონისძიების საკითხს დღეს, 16 საათზე მოსამართლე ბადრი შონია განიხილავს.

გამოძიება მას 1,4965 გრამი ნარკოტიკული საშუალება MDMA-ის შეძენა შენახვას ედავება. მიშკა მგალობლიშვილი 7 ივნისს დააკავეს.

გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე მიმდინარეობს. ამ მუხლით გათვალისწინებული ქმედება ისჯება თავისუფლების აღკვეთით ვადით რვიდან ოც წლამდე ან უვადო თავისუფლების აღკვეთით.

მგალობლიშვილის ცოლი ერიკა კოპელენდი On.ge-სთან ინტერვიუში აცხადებს, რომ მიშკას ნარკოტიკი არ ჰქონია და ვარაუდობს, რომ ჩაუდეს. მისი თქმით, დაჭერის მიზეზი გახდა ჯგუფის ახალი კლიპი Birja Mafia - Tsl Shavi Zeda, სადაც ერთ-ერთ კადრში პოლიციელს ძაღლის საყელური უკეთია. ვიდეოში პოლიციელის კადრი უკვე დაბლარულია.

შსს-მ ამავე ბრალდებით, კლიპში მონაწილე მეორე რეპერიც დააკავა. მისი სასამართლო პროცესი ჯერ ჩანიშნული არ არის.