ჯეიმს ვების კოსმოსურმა ტელესკოპმა კიდევ ერთი მნიშვნელოვანი აღმოჩენა გააკეთა. ტელესკოპმა ცნობილ სამყაროში ყველაზე ცივი ყინული დააფიქსირა.

ჟურნალ Nature Astronomy-ში გამოქვეყნებული ახალი კვლევის მიხედვით, ვარსკვლავთშორის ყინულზე მინუს 226 გრადუსია.

კოსმოსური წარმონაქმნები ნაპოვნი იქნა როგორც ვარსკვლავთწარმომქმნელი მოლეკულური ღრუბლის ნაწილი, რომელიც Chamaeleon I-ის რეგიონშია. ობიექტი ქამალეონის თანავარსკვლავედის სამხრეთ ნაწილში, დედამიწიდან დაახლოებით 500 სინათლის წლის მანძილზეა. ვების მძლავრი ახლო ინფრაწითელი კამერის (NIRCam) წყალობით ასტრონომებმა შეძლეს დაენახათ გაყინული მოლეკულები, რომლებიც აქამდე შეუმჩნეველი რჩებოდნენ.

"ყინულები ჩნდება როგორც ჩაღრმავება ვარსკვლავური შუქის ფონზე. რაიონებში, რომლებიც ასეთი ცივი და მკვრივია, ფონური ვარსკვლავის სინათლის დიდი ნაწილი დაბლოკილია. ამიტომ ვების მგრძნობელობა აუცილებელი იყო ვარსკვლავების შუქის გამოსავლენად და, შესაბამისად, მოლეკულურ ღრუბელში ყინულის დასადგენად", — თქვა კვლევის თანაავტორმა კლაუს პონტოპიდანმა.

გასაოცარია, რომ ყინული ასევე შეიცავს სასიცოცხლო ელემენტებს პლანეტის ფორმირებისთვის. საუბარია ნახშირბადზე, წყალბადზე, ჟანგბადზე, აზოტსა და გოგირდზე. მეცნიერებმა აღმოაჩინეს, რომ ზოგიერთი მათგანი მოდის ორგანული მოლეკულების სახით, როგორიცაა მეთანოლი და შესაძლოა ეთანოლი, ისევე როგორც სხვა ნაერთები, რომლებიც აუცილებელია სიცოცხლისთვის, მათ შორის ნახშირორჟანგი, ამიაკი, მეთანი და, რა თქმა უნდა, წყალი.

ამას შეიძლება უზარმაზარი გავლენა ჰქონდეს სამყაროში სიცოცხლის წარმოშობის ჩვენს გაგებაზე, ამბობენ მეცნიერები.

"რთული ორგანული მოლეკულების იდენტიფიცირება ნიშნავს, რომ ამ კონკრეტულ ღრუბელში განვითარებული მრავალი ვარსკვლავი და პლანეტარული სისტემა მოლეკულებს საკმაოდ მოწინავე ქიმიურ მდგომარეობაში მიიღებს. ეს შეიძლება ნიშნავდეს, რომ პლანეტარულ სისტემებში პრებიოტიკური მოლეკულების წინამორბედების არსებობა ვარსკვლავების ფორმირების საერთო შედეგია და არა ჩვენი მზის სისტემის უნიკალური თვისება", — განმარტა კვლევის თანაავტორმა უილ როჩამ.

აღმოჩენები შეიძლება მნიშვნელოვანი გამოდგეს ორგანული მოლეკულების ფორმირების გასაგებად.

"ეს დაკვირვებები ხსნის ახალ ფანჯარას ფორმირების გზებზე მარტივი და რთული მოლეკულებისთვის. ისინი კი ვიცით, რომ საჭიროა სიცოცხლის სამშენებლო ბლოკების შესაქმნელად", — თქვა კვლევის წამყვანმა ავტორმა და ლეიდენის ასტრონომმა მელისა მაკკლურმა.