ევროსაბჭოს საპარლამენტო ასამბლეამ (PACE-მ) რეზოლუციის ტექსტი გამოაქვეყნა.

რატომ არის მნიშვნელოვანი: რეზოლუციაში შეფასებულია საქართველოს მიღწეული პროგრესი და გამოთქმულია რეკომენდაციები და შეშფოთება მთავრობის მისამართით, რათა შესრულდეს ევროსაბჭოში გაწევრიანების ვალდებულებები.

  • ასამბლეა საუბრობს პოლიტიკურ პოლარიზაციაზე, მედიაგარემოსა და სასამართლო სისტემასთან დაკავშირებულ გამოწვევებზე.

დეტალები: ევროსაბჭოს საპარლამენტო ასამბლეა გამოხატავს შეშფოთებას ქვეყანაში არსებული "უკიდურესი პოლიტიკური პოლარიზაციის" გამო.

  • "ეს გავლენას ახდენს ქვეყანაში რეფორმების განხორციელებაზე და მხარეების მონაწილეობაზე საქართველოს შემდგომი კონსოლიდაციისა და ქვეყნის ევროატლანტიკური ინტეგრაციისთვის საჭირო რეფორმებში", — ნათქვამია რეზოლუციის ტექსტში.

ასამბლეა მოუწოდებს ხელისუფლებას, განახორციელოს სასამართლო სისტემის რეფორმების საფუძვლიანი დამოუკიდებელი შეფასება, "რათა წარიმართოს რეფორმები ქვეყანაში ნამდვილი დამოუკიდებელი სასამართლო სისტემის უზრუნველსაყოფად", — წერს PACE.

რეზოლუციაში საუბარია ბოლო დროს მედიის კუთხით არსებულ გამოწვევებზეც და გამოთქმულია რეკომენდაციები.

  • "მოვუწოდებთ ხელისუფლებას, გადადგას ყველა შესაძლო ნაბიჯი, რათა შეამციროს მედიაგარემოში არსებული დაძაბულობა".

ევროსაბჭო გამოხატავს მხარდაჭერას საქართველოს სუვერენიტეტისა და ტერიტორიული მთლიანობისადმი და გმობს უკანონო ოკუპაციასა და მცოცავ ანექსიას.

  • "PACE მოუწოდებს ხელისუფლებას, უპასუხოს ევროკავშირის 12 რეკომენდაციას, რათა მას მიენიჭოს ევროკავშირის წევრობის კანდიდატის სტატუსი, რომლისკენაც იგი სამართლიანად ისწრაფვის", — ნათქვამია ტექსტში.