ინფორმაციას დე ფაქტო სამართალდამცავი უწყება ავრცელებს.

რატომ არის მნიშვნელოვანი: სოხუმის ე.წ. პროკურატურის ცნობით, რუსლან გამისონია, რომელიც, მათივე ინფორმაციით, წარსულში განზრახ მკვლელობისა და რუსეთის ორი მოქალაქის გაუპატიურებასა და გარყვნილ ქმედებაშია ბრალდებული, 2022 წლის ზაფხულის შემდეგ თავს საქართველოს აფარებს.

  • ამჯერად დე ფაქტო პროკურატურა გამისონიას ე.წ. სახელმწიფო საზღვრის უკანონო კვეთასა და "აფხაზეთის ტერიტორიული მთლიანობისა და ხელშეუხებლობის დარღვევისკენ" მიმართულ მოწოდებებს ედავება.

დეტალები: სოხუმის დე ფაქტო პროკურატურის განცხადებით, გამისონია აფხაზეთის საქართველოს შემადგენლობაში შესვლასთან დაკავშირებულ მოწოდებებს სოციალურ ქსელ Tik Tok-ში ავრცელებდა.

  • "ვიდეოს სახით გამოქვეყნებულ პუბლიკაციებში გამოხატავს იდეებს, რომლებიც შეიცავს მომხმარებელთა შეუზღუდავი წრისადმი ფარულ მოწოდებას, რაც მიზნად ისახავს აფხაზეთის რესპუბლიკის ტერიტორიული მთლიანობისა და ხელშეუხებლობის დარღვევას და აფხაზეთის რესპუბლიკის საქართველოს შემადგენლობაში შესვლას", — ნათქვამია დე ფაქტო უწყების განცხადებაში.
  • მათივე ცნობით, გამისონიამ ოკუპირებული აფხაზეთი 2022 წლის ივნისში სათანადო დოკუმენტაციებისა და ნებართვის გარეშე დატოვა.