ქართული ოცნების დეპუტატის მტკიცებით, მსგავს პროვოკაციას ალტ-ინფო წამოეგება თუ ნებისმიერი სხვა, "შემთხვევის ამბავია".

რატომ არის მნიშვნელოვანი: გუშინ, 15 იანვარს ყვარელში საჯარო ლექციის ჩასატარებლად ჩასულ ლევან ბერძენიშვილს ძალადობრივმა ჯგუფებმა არ მისცეს ევრო-ატლანტიკური ცენტრის შენობაში შესვლის და ლექციის ჩატარების საშუალება.

  • შეკრებილები ამბობდნენ, რომ "ერეკლე მეფის მოღალატედ შერაცხავს" კახეთში არ ელოდნენ. როგორც ბერძენიშვილი ფორმულასთან ამბობს, ალტ-ინფოს ჟურნალისტმა მას უთხრა, რომ ეს პირები პრორუსული, ძალადობრივი და ჰომოფობიური დაჯგუფების, ალტ-ინფოს წევრები იყვნენ.

დეტალები: ვოლსკი ფიქრობს, რომ "ზოგადად, საქართველოსთვის, ქართველებისთვის შეურაცხმყოფელი პოზიცია, რომელიც გააჩნია ლევან ბერძენიშვილს ბევრ საკითხთან დაკავშირებით, არის რეალობა და ამ რეალობას ხშირად გაიმეორებენ იმისათვის, რომ ასეთი ინციდენტები მოხდეს".

  • "რაც შეეხება კახეთში ლექციის ჩატარებას ლევან ბერძენიშვილის მიერ, ესეც რასაკვირველია პროვოკაციული თემაა, სულ რომ არ არსებობდეს ალტ- ინფო, ეს პროვოკაციული თემაა და სწორედაც რომ ასეთ დაპირისპირებას ითვალისწინებდა ეს პროვოკაცია. ზუსტად მოხდა ის, რისთვისაც იგეგმებოდა ეს ე.წ. ლექცია".
  • ვოლსკი ამტკიცებს, თითქოს ლევან ბერძენიშვილი ჩადგა პროვოკატორთა სამსახურში.

გამოხმაურებები: DRI-ს შეფასებით, მოძალადე ჯგუფების თავდასხმები ხელისუფლების წახალისებულია.

  • დროას ლიდერი ელენე ხოშტარიას განცხადებით, "ტყუილია, თითქოს ყვარელმა არ მიიღო ლევან ბერძენიშვილი, პირიქით, მას იქ ელოდებოდნენ, რის გამოც დააორგანიზეს ხალხი".
  • ის გამოდის ინიციატივით, დაორგანიზდნენ და გაემგზავრონ ყვარელში, რათა მოუსმინონ და მსურველებს მოასმენინონ ლევან ბერძენიშვილის ლექცია.
  • ენმ-ის ლიდერის განცხადებით კი ყვარელში პოლიციამ კიდევ ერთხელ დაუშვა კანონით დაუშვებელი.
  • "წარსულშიც და ახლაც, საქართველოს მოწინავე პატრიოტები მის უკეთეს ბედს განათლებას უკავშირებდნენ. ასე იყო ერეკლე მეფეც. არ შეიძლება მის სახელს ილია ჭავჭავაძეზე ლექციის ჩასაშლელად და განათლების საწინააღმდეგოდ იყენებდნენ", — დაწერა მან.

ყვარლის ევროკლუბი შსს-ს მოუწოდებს, დაიწყოს გამოძიება ორგანიზაციის საქმიანობაში ხელის შეშლის ფაქტზე.

  • ყვარლის ევროკლუბის განცხადებით, მზად არიან გამოძიებას მიაწოდონ სრული ინფორმაცია მომხდარზე და ასევე გადასცენ გარე პერიმეტრზე დამონტაჟებული კამერებიდან ამოღებული ჩანაწერები.