თბილისის სააპელაციო სასამართლოში 7 ივნისს, 10:00 საათზე გაგრძელდება რუსთავი 2-ის საქმის განხილვა. მომდევნო პროცესზე თავის სიტყვას გააგრძელებს ქიბარ ხალვაშის ადვოკატი პაატა სალია. სალია დღეს რამდენიმე საათის განმავლობაში კითხულობდა სიტყვას, თუმცა, სამუშაო საათების დასრულების გამო, სხდომა შეწყდა.

რუსთავი 2-ის საქმის განხილვა დღეს, 3 ივნისს, ხმაურით დაიწყო. თავდაპირველად მოსამართლე ნათია გუჯაბიძემ უპასუხა ნიკა გვარამიას ბრალდებებს მის მიმართ დისციპლინური სამართალწარმოების შესახებ. აღნიშნულს მოჰყვა რეპლიკები და ხმაური დარბაზში, რის გამოც დამსწრეთა დიდი ნაწილი პროცესიდან გააძევეს. სასამართლოსადმი უპატივცემულობის გამო ჯერ დააჯარიმეს, შემდეგ კი გააძევეს რუსთავი 2-ის ადვოკატები - თამთა მურადაშვილი და დიმიტრი ძაგნიძე.

თბილისის სააპელაციო სასამართლო განიხილავს რუსთავი 2-ის სააპელაციო საჩივარს. სწორედ ამ ინსტანციამ უნდა გადაწყვიტოს, დარჩება თუ არა ძალაში საქალაქო სასამართლოს გადაწყვეტილება რუსთავი 2-ის ქიბარ ხალვაშისთვის მიკუთვნებასთან დაკავშირებით.