გამოცემა LivePress-ის ინფორმაციით, მოქალაქე ვალტერ აქუბარდია ზუგდიდისა და ცაიშის ეპისკოპოსის, გერასიმე შარაშენიძეს წინააღმდეგ სასამართლოში ჩივილს აპირებს.

როგორც აქუბარდია ამავე გამოცემასთან ჰყვება, აქუბარდიას ყოფილი ქონება ეკლესიამ 170 ათას ლარად გაყიდა. კერძოდ, ვალტერ აქუბარდიას რამდენიმე წლის წინ შვილის გარდაცვალების შემდეგ, სურდა მის სახლში მონასტერი გახსნილიყო. ამისათვის კი მან ადგილობრივ მღვდელს უსასყიდლოდ გადასცა სოფელში მდებარე უძრავი ქონება, თუმცა ახლახან შეიტყო, რომ კარმიდამო ეპისკოპოსმა გერასიმემ გაყიდა.

მისი თქმით, გადაცემული კარ-მიდამო ეპარქიამ გადაიფორმა და ენერგოკომპანიას მიჰყიდა, რათა მაღალი ძაბვის ბოძები ჩაიდგას სოფელში.

მღვდელი ანდრია მარღანია ადასტურებს, რომ ვალტერ აქუბარდიამ სახლ-კარი და მიწის ნაკვეთი მართლაც აჩუქა და იმისაც ადასტურებს, რომ ქონება საპატრიარქომ ენერგოკომპანიას მიჰყიდა, თუმცა ამბობს, რომ ამის კატეგორიული წინააღმდეგი იყო.

მარღანიას თქმით, აქუბარდიას სახლ-კარი დროებით მასზე გაფორმდა, შემდეგ კი ქონება საპატრიარქოს სახელზე გადაფორმდა.

როგორც ანდრია მარღანია ამბობს, ამის შემდეგ ეპისკოპოსი შეხვდა კომპანიის წარმომადგენელს და იქ უკვე რა და როგორ გადაწყდა, მისთვის უცნობია.

ვალტერ აქუბარდია ამბობს, რომ გერასიმე შარაშენიძის წინააღმდეგ სასამართლოს უახლოეს დღეებში მიმართავს და მოითხოვს ჩუქების ხელშეკრულების ბათილად ცნობას.