საქართველოს საპარლამენტო უმცირესობის, ევროპული საქართველოს წევრი, სერგო რატიანი მიიჩნევს, რომ ადამიანის უფლებათა კომიტეტში ჟურნალისტების აქციის დროს კომიტეტის თავმჯდომარეს, სოფო კილაძეს ცინიკური რეაქცია ჰქონდა. ჟურნალისტებმა კომიტეტში აქცია საქართველოდან გაუჩინარებული აზერბაიჯანელი ჟურნალისტის, აფგან მუხტარლის მხარდასაჭერად გამართეს.

"ადამიანის უფლებების კომიტეტის თავმჯდომარეს და მთელ კომიტეტს არ აქვს უფლება, რომ ასეთ საგანგებო ვითარებაში ამ საკითხზე არ იმსჯელოს. ჩვენ მოვისმინეთ ის, რომ უსასრულოდ უნდა დაელოდონ გამოძიებას და ეს მეტყველებს, რომ დღევანდელი უმრავლესობა და კონკრეტულად ეს კომიტეტი ფარავს დანაშაულს, რომელიც ჩაიდინეს სამართალდამცველებმა," - აღნიშნა სერგო რატიანმა.

საქართველოს პარლამენტის ადამიანის უფლებათა კომიტეტის სხდომაზე ჟურნალისტების აქცია სხდომის დაწყებიდან რამდენიმე წუთში გაიმართა. სხდომის დაწყებიდან რამდენიმე წუთში იქ მისულმა ჟურნალისტებმა თავზე პოლიეთილენის შავი პარკი ჩამოიფარეს და ასე გამოხატეს აფგან მუხტარლის მხარდასაჭერი პროტესტი.

სხდომაზე დასწრება ჟურნალისტებმა მას შემდეგ გადაწყვიტეს, რაც ამ კომიტეტის თავმჯდომარეს, სოფო კილაძესა და საქართველოს პარლამენტის თავმჯდომარეს, ირაკლი კობახიძეს შეხვედრის სურვილის შესახებ აცნობეს. ჟურნალისტებს მათგან პასუხი ამ დრომდე არ მიუღიათ.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს