საქართველოდან გაუჩინარებული აზერბაიჯანელი ჟურნალისტის, აფგან მუხტარლის ცოლი, ლეილა მუსტაფაევა შინაგან საქმეთა სამინისტროს სპეციალური დანაყოფის მიერ დაცვაზე თანხმობას ამბობს. ამის შესახებ მუსტაფაევამ On.ge-ს განუცხადა.

"ჩემი ქმარი გაიტაცეს ჩემს სახლთან ახლოს, ამიტომ, რა თქმა უნდა, თავს უსაფრთხოდ არ ვგრძნობ. სწორედ ამიტომ დავთანხმდი დაცვის დანიშნვას ჩემთვის და ჩემი შვილისთვის," - აღნიშნა მუსტაფაევამ.

აფგანის ადვოკატის, არჩილ ჩოფიკაშვილის თქმით, საქმის ორ მოწმისთვის დაცვის გამოყოფაზე შსს დამატებით იმსჯელებს და მიიღებს გადაწყვეტილებას. ადვოკატის აზრით, დაცვის უზრუნველყოფა მოწმეებისთვისაც აუცილებელია.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.