კონფერენციაზე საგარეო პოლიტიკის მიმართულებით 2022 წლის საქმიანობა შეაჯამეს და მომდევნო წლის სამოქმედო გეგმაზე იმსჯელეს.

რატომ არის მნიშვნელოვანი: ადმინისტრაციაში ამბობენ, რომ პრეზიდენტი მიწვეული იყო, არმისვლის მიზეზი კი პროტოკოლით გათვალისწინებული ადგილების რიგითობის დარღვევა გახდა.

  • მათივე განმარტებით, პრეზიდენტისთვის შესაბამისი ადგილის არგამოყოფა დიპლომატიური პროტოკოლის უხეში დარღვევაა.
  • ადმინისტრაციაში დამაზუსტებელ კითხვებს არ პასუხობენ.

დეტალები: საქართველოს ელჩი ევროკავშირში, ვახტანგ მახარობლიშვილი, პრეზიდენტის არდასწრებაზე დასმული კითხვის საპასუხოდ ამბობს, რომ საორგანიზაციო საკითხებზე ის ვერ ისაუბრებს.

  • "ელჩები ამ ნაწილის დაგეგმვაში მონაწილეობას არ ვიღებთ და არ მიგვიღია", — თქვა მან.

პრეზიდენტის ადმინისტრაციამ მოგვიანებით განმარტება გაავრცელა და თქვა, რომ ელჩების კონფერენციის გახსნის ღონისძიებაზე მასპინძლის მხრიდან საქართველოს პრეზიდენტისთვის "მისი სტატუსის შესაბამისი" ადგილი განსაზღვრული არ ყოფილა.

  • "დაუშვებელია სახელმწიფო ინსტიტუტების ღონისძიებებში, მით უფრო საქართველოს საგარეო საქმეთა სამინისტროს მიერ ორგანიზებულ მთავარ დიპლომატიურ კონფერენციაზე, სახელმწიფო და დიპლომატიური პროტოკოლის საყოველთაოდ აღიარებული და დამკვიდრებული წესების უხეში დარღვევა", — ნათქვამია განცხადებაში.

ელჩების კონფერენციაზე სიტყვით გამოვიდნენ პრემიერმინისტრი, ირაკლი ღარიბაშვილი, საგარეო უწყების ხელმძღვანელი, ილია დარჩიაშვილი და პარლამენტის თავმჯდომარე, შალვა პაპუაშვილი.

  • ე.წ. ამბასადორიალი, საზღვარგარეთ საქართველოს დიპლომატიური მისიებისა და საგარეო საქმეთა სამინისტროს სტრუქტურული ერთეულების ხელმძღვანელების მონაწილეობით ყოველწლიურად იმართება.
  • პანდემიის შემდგომ კონფერენცია ფიზიკურ ფორმატში წელს პირველად ტარდება.