თბილისიდან გატაცებული აზერბაიჯანელი ჟურნალისტის, აფგან მუხტარლის მეუღლეს, ლეილა მუსტაფაევას და შვილს სახელმწიფომ სპეციალური დაცვა გამოუყო. ამის შესახებ On.ge-ს მუხტარლის ერთ-ერთმა ადვოკატმა, არჩილ ჩოფიკაშვილმა განუცხადა.

ჩოფიკაშვილის თქმით, საქმის ორ მოწმისთვის დაცვის გამოყოფაზე შსს დამატებით იმსჯელებს და მიიღებს გადაწყვეტილებას. ადვოკატის აზრით, დაცვის უზრუნველყოფა მოწმეებისთვისაც აუცილებელია.

როგორც ადვოკატი ამბობს, ამ შემთხვევაში საკითხი უკვე გადაწყვეტილი იყო. მანამდე, პრემიერ-მინისტრმა, გიორგი კვირიკაშვილმა პრეზიდენტს მოუწოდა ლეილა მუსტაფაევასა და მისი შვილისთვის, გამონაკლისის სახით, მოკლე ვადაში მიენიჭიებინა საქართველოს მოქალაქეობა, რაზეც პრეზიდენტის ადმინისტრაციამაც მზაობა გამოთქვა. თუმცა მუსტაფაევამ შეთავაზებაზე უარი თქვა და განაცხადა: "მე ვერ ვიქნები იმ ქვეყნის მოქალაქე, სადაც ჩემი ქმარი გაიტაცეს".

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.