ის ჟურნალისტები, რომლებიც საქართველოს ხელისუფლებისგან აზერბაიჯანელი ჟურნალისტის, აფგან მუხტარლის საქმესთან დაკავშირებით არსებულ კითხვებზე პასუხს ითხოვენ, დღეს ხვდებიან საქართველოში ევროკავშირის წარმომადგენლობის ხელმძღვანელს, იანოშ ჰერმანს.

ჟურნალისტები გეგმავენ, რომ ელჩს გააცნონ საკუთარი მოსაზრებები მუხტარლის საქმეზე და სთხოვონ მას, დააკვირდეს აღნიშნული საქმის გამოძიებას. 6 ივნისს ასევე დაგეგმილია შეხვედრა საქართველოში ამერიკის შეერთებული შტატების ელჩთან.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ. საქართველოს პრემიერმინისტრმა მოუწოდა პრეზიდენტს, მუხტარლის ცოლ-შვილს დაჩქარებული წესით მიანიჭოს საქართველოს მოქალაქეობა. მუხტარლის ცოლმა, ლეილა მუსტაფაევამ On.ge-ს უთხრა, რომ მას არ სჭირდება იმ ქვეყნის მოქალაქეობა, საიდანაც მისი ქმარი გაიტაცეს.