შაბათს ღამით, ლონდონში განხორციელებული ტერაქტის შედეგად, 6 ადამიანი დაიღუპა. 48 დაჭრილი ქალაქის ხუთ საავადმყოფოშია გადაყვანილი. ინფორმაციას BBC ავრცელებს.

გარდიანის ცნობით, ერთ-ერთი დაშავებული ახალი ზელანდიის მოქალაქე, კომაში იმყოფება.

ლონდონის დროით 22 საათზე, ფურგონი ხიდზე მიმავალ ადამიანებს დაეჯახა. ამ დროს, მანქანიდან რამდენიმე პირი გადმოხტა. ისინი ხიდზე და მის მიმდებარედ არსებულ სავაჭრო უბან ბორო მარკეტში მოქალაქეებს დანებით დაესხნენ თავს.

მძიმედ დაშავებულებს შორის ერთი პოლიციელია. მას ჭრილობები აქვს სახეზე, ფეხზე და თავში.

8 წუთიანი სროლის შემდეგ, პოლიციამ 3 ეჭვმიტანილი მოკლა. სკოტლენდ-იარდის განცხადებით, ისინი ყალბ ასაფეთქებელ ჟილეტებს ატარებდნენ.

ამ დროისთვის ლონდონში გადაკეტილია ხიდი, მიმდებარე მეტრო და რამდენიმე ქუჩა. ქვეყანაში მიმდინარე წინასაარჩევნო კამპანიები შეჩერებულია.

"მათ გამარჯვების უფლებას არ მივცემთ" - განაცხადა ლონდონის მერმა, სადიქ ხანმა.

თვითმხილველთა კომენტარები

BBC თავდასხმისას ადგილზე მყოფ რამდენიმე პირს ესაუბრა.

მარკი, ფოტოგრაფი:

ლონდონის ხიდს სურათებს ვუღებდი, როდესაც დავინახე, რომ ჩემგან დაახლოებით 20 მეტრში მყოფ ადამიანთა ჯგუფს მანქანა დაეჯახა. ის სხვადასხვა მხარეს მოძრაობას აგრძელებდა. ეს ყველაფერი ჩემს თვალწინ ხდებოდა და იმ წამებში მხოლოდ იმაზე ვფიქრობდი, რომელ მხარეს გაქცევა აჯობებდა.

თავდასხმისას ხიდზე იყო ერიკიც:

ფურგონიდან სამი კაცი გადმოხტა და მათ მაშინვე თავდასხმა დაიწყეს. ხალხი ხიდის კიბეებზე ჩარბოდა, ისინი დანებით მისდევდნენ და ყვიროდნენ, რომ ეს ალაჰისთვის ხდებოდა.

ბენი ბოროს სადგურში იმყოფებოდა, როდესც ტერორისტი დაინახა:

კაცს წითელი და უდიდესი დანა ეჭირა,ალბათ 30 სანტიმეტრის სიგრძის. ის კაცს ესხმოდა თავს, დახლოებით სამჯერ დაჭრა და ამ ყველაფერს დიდი გულგრილობით აკეთებდა. მსხვერპლი წინააღმდეგობის გაწევას ცდილობდა, მაგრამ ბევრი ვეღარაფერი შეეძლო. ის აუღელვებლად ურტყამდა დანას, სანამ მსხვერპლი მიწაზე არ დაეცა.

ჟერარდი ბორო მარკეტის მიმდებარედ იყო, როდესაც დაინახა, რომ დანებით შეიარაღებული 3 პირი მისი ადგილის მიმართულებით მირბოდა. მისი თქმით, შეეშინდა, მაგრამ წინააღმდეგობა გაუწია:

ისინი ღია ბარებში და ქუჩებში ადამიანებს ესხმოდნენ თავს. რაც ხელში მხვდებოდა, ყველაფერს ვსროდი. ალბათ სკამებს და ტაბურეტებს. ერთ-ერთს, მგონი, თავში მოვარტყი. ამ დროს, ისინი ჩემკენ წამოვიდნენ, რომ დავეჭირე და მხოლოდ ამ დროს მომაფიქრდა გაქცევა. მთელი ძალით მივრბოდი და ვიცოდი, რომ ერთი წაბორძიკების შემთხვევაშიც კი, დამეწეოდნენ და მოვკვდებოდი. ისინი იქ და იმ დროს მომკლავდნენ.

ალექსი მიმდებარე ბარში იყო:

ქალი, რომელიც ალბათ 20-დან 30-წლამდე იყო, ტორტმანით შემოვიდა და დაეცა, მას მხრიდან და პირიდან სისხლი მოსდიოდა, მგონი ყელშიც იყო დაჭრილი. ადამიანები მის დასახმარებლად გაიქცნენ. მერე პოლიცია მოვიდა და მათთან ერთად დავტოვეთ მიმდებარე ტერიტორია. სირბილისას ვხედავდი, რომ დაჭრილებს ჩვეულებრივი მოქალაქეები უწევდნენ პირველად დახმარებას.

ლონდონის ტერაქტები

2017 წელს, ეს ლონდონში განხორციელებული მეორე ტერატქია. 22 მარტს, ტერორისტი ვესტმინსტერის ხიდზე მოსიარულე ადამიანებში მანქანით შევარდა და 4 ადამიანი იმსხვერპლა. მეხუთე დაღუპული ტურისტი იყო, რომელიც ხიდიდან გადახტა და მოგვიანებით საავადმყოფოში გარდაიცვალა.