ამის შესახებ პარტიის წევრებმა საგანგებო ბრიფინგზე განაცხადეს.

რატომ არის მნიშვნელოვანი: 14 დეკემბერს, მას შემდეგ, რაც ექსპრეზიდენტი საკუთარ სასამართლო პროცესზე არ ჩართეს და მიზეზად ტექნიკური პირობების არარსებობა დაასახელეს, პენიტენციურმა სამსახურმა დამონტაჟებული კადრები გაასაჯაროვა, რომელიც კლინიკა ვივამედში, მიხეილ სააკაშვილის პალატაშია გადაღებული.

  • კადრები აგვისტოდან დეკემბრის ჩათვლით თარიღდება და უხმოდ და უკონტექსტოდ არის შეკრული. 10-წუთიანი ვიდეოდან ბოლო პერიოდის კადრებს, რომლებიც სააკაშვილის ახლანდელ მდგომარეობას ასახავს, ყველაზე ნაკლები დრო, 19 წამი ეთმობა. ნაწილზე კი თარიღი საერთოდ არ ჩანს.
  • ვიდეომასალის გამოქვეყნებას წინ უძღოდა იუსტიციის მინისტრის, რატი ბრეგაძის მუქარა, რომ, თუ "სიმულაციური ქმედებები" არ შეწყდებოდა, გაასაჯაროებდნენ მტკიცებულებებს.

დეტალები: აჭარის უმაღლეს საბჭოში ენმ-ს ფრაქციის თავმჯდომარე, ელგუჯა ბაგრატიონი ამბობს, რომ მათი პარტია "რუსული ხელისუფლების" გვერდით ჯდომას აღარ აპირებს.

  • მისი განცხადებით, ხელისუფლება სახელმწიფოს წინააღმდეგ საქმიანობითა და მიხეილ სააკაშვილის სიკვდილით დასჯითაა დაკავებული.
  • "ყოველდღიურად ვუყურებთ სიკვდილით დასჯის ქრონიკას, თუ როგორ კლავს წამებით მიხეილ სააკაშვილის, ბიძინა ივანიშვილის დავალებით, ქართული ოცნება.
  • მაშინ როცა ხელისუფლება დაკავებული უნდა იყოს ევროინტეგრაციის მიზნების მისაღწევად და კონკრეტული რეფორმებით, ნაცვლად ამისა, დაკავებულია შურისძიებითა და პოლიტიკური ანგარიშსწორებით, რომ ევროპის კარი სამუდამოდ დაიკეტოს ჩვენთვის", — თქვა ბაგრატიონმა.
  • მისივე განცხადებით, განვითარებული პროცესების ყურებას კაბინეტიდან აღარ აპირებენ და სააკაშვილის "რუსული ტყვეობიდან" დასახსნელად იბრძოლებენ.

გიორგი კირთაძე, ენმ-ს ფრაქციის წევრი აჭარის უმაღლეს საბჭოში, ამბობს, რომ ერთობის დროა არა მხოლოდ მათ პარტიაში, არამედ მთელს საზოგადოებაში, რადგან ავტოკრატიული რეჟიმის დამარცხება სხვაგვარად შეუძლებელია.

  • "ავტოკრატიულ რეჟიმებთან ბრძოლა არ არის მარტივი ამბავი და არც პირადად პუტინის ტყვეობაში მყოფი მიხეილ სააკაშვილის დახსნა არ არის მარტივი ამბავი, რომელსაც გუშინ, პრაქტიკულად, სასამართლომ სასიკვდილო განაჩენი გამოუტანა.
  • წარმოუდგენელია, ერთი მხრივ, ვუყურებდეთ გამოცხადებულ სიკვდილის ქრონიკას საქართველოს მესამე პრეზიდენტთან მიმართებაში და პარალელურ რეჟიმში, რაღაცა დემოკრატიის იმიტაციას ვქმნიდეთ და ვსხდებოდეთ ქართულ ოცნებასთან ბიუჯეტის თუ სხვა საკითხების განსახილველად", — თქვა მან.