გირჩის რელიგიურმა ორგანიზაციამ - საქართველოს ქრისტიანულმა, ევანგელისტურმა, პროტესტანტულმა ეკლესიამ - ბიბლიურმა თავისუფლებამ ორ თვეში 438 მღვდელმსახური აკურთხა. ამის შესახებ ინფორმაცია ორგანიზაციის ფეისბუკ გვერდზე რამდენიმე წუთის წინ გამოქვეყნდა.

გამოქვეყნებულ ინფორმაციას თან ერთვის "მღვდელმსახურების გეოგრაფია", რომელის საქართველოს სხვადასხვა დასახლების მიხედვითაა დაყოფილი. ამ რუკის მიხედვით, ყველაზე მეტი (308) მღვდელმსახური ორგანიზაციამ თბილისში აკურთხა, შემდეგ ადგილზე კი ქუთაისია 36 მღვდელმსახურით. ამ ჩამონათვალში მოხვდა საქართველოს ოკუპირებული ტერიტორიაც, აფხაზეთის რეგიონი. ამ რეგიონიდან ბიბლიურ თავისუფლებაში ხუთი ადამიანი ეკურთხა მღვდელმსახურად.

ფოტო: ბიბლიური თავისუფლება

ბიბლიური თავისუფლება პოტენციურ შემომწირველებს კიდევ ერთხელ ახსენებს საბანკო რეკვიზიტებს და წერს: "დაეხმარეთ ჩვენს ეკლესიას, რომ თავისუფლება ყველა რეგიონში და ყველასთვის იყოს ხელმისაწვდომი".

გირჩის მიერ რელიგიური ორგანიზაციის დაფუძნების შესახებ ინფორმაცია On.ge-მ 21 აპრილს გაავრცელა. გირჩის წევრებმა 2017 წლის მარტში დააფუძნეს რელიგიური ორგანიზაცია, რომელიც სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი, შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.