საქართველოს ჟურნალისტური ეთიკის ქარტიის საბჭო სამართალდამცავ სტრუქტურებს მიმართავს და აზერბაიჯანელი აქტივისტისა და ჟურნალისტის, აფგან მუხთარლის „გაუჩინარების“ საქმის უსწრაფესად გამოძიებას ითხოვს. ამის შესახებ საბჭომ განცხადება რამდენიმე წუთის წინ გაავრცელა.

"საქართველოს ჟურნალისტური ეთიკის ქარტიის საბჭო მოუწოდებს სამართალდამცავ სტრუქტურებს, უპასუხონ ჟურნალისტების კონკრეტულ კითხვებს და აუხსნან საზოგადოებას, როგორ აღმოჩნდა თბილისში „გაუჩინარებული“ ჟურნალისტი აზერბაიჯანის ტერიტორიაზე? როგორ გადაკვეთა მან საზღვარი ისე, რომ მისი საიდენტიფიკაციო დოკუმენტები თბილისშია, როგორც ამას ახლობლები აცხადებენ?" - ვკითხულობთ განცხადებაში.

როგორც ქარტია აღნიშნავს, ადამიანის უფლებების კუთხით რეგიონში არსებული მძიმე მდგომარეობის გამო ხელისუფლების მიმართ კრიტიკულად განწყობილი ჟურნალისტები და აქტივისტები საკუთარი ქვეყნებიდან იდევნებიან, საქართველო კი მათთვის თავშესაფარია, სადაც პროფესიული საქმიანობის შესაძლებლობა ეძლევათ. ამ გარემოების გამო, ქარტიას მიაჩნია, რომ მნიშვნელოვანია საქართველოში მათი უფლებების დაცვა შესაძლებელი იყოს.

"ქარტიის საბჭო მოუწოდებს ჟურნალისტებს გამოიჩინონ სოლიდარობა, აქტიურად გააშუქონ მომხდარი შემთხვევა და ხელისუფლებას მოსთხოვონ პასუხები არსებულ კითხვებზე," - აღნიშნულია განცხადებაში.

აზერბაიჯანელი ჟურნალისტი აფგან მუხთარლი თბილისში დაიკარგა. ის გუშინ სახლიდან გავიდა და არ დაბრუნებულა. მისმა მეუღლემ, ლეილა მუსტაფაევამ პოლიციას მიმართა. აფგანი ერთ წელზე მეტია თბილისში ცხოვრობს. მას თავის საქმიანობიდან გამომდინარე აზერბაიჯანის ხელისუფლებასთან პრობლემები ჰქონდა.

საქართველოს შინაგან საქმეთა სამინისტრო საქმეს სისხლის სამართლის კოდექსის 143-ე მუხლი მიხედვით იძიებს, რაც თავისუფლების უკანონო აღკვეთას გულისხმობს.

თბილისში დაკარგული აზერბაიჯანელი ჟურნალისტი, აფგან მუხთარლი ბაქოში, სახელმწიფო სასაზღვრო სერვისის საგამოძიებო განყოფილებაში იმყოფება. ამის შესახებ ინფორმაციას ჟურნალისტი ხადიჯა ისმაილოვა ავრცელებს. მისივე ცნობით, მუხთარლი მეგობარს დაუკავშირდა და ადვოკატის დახმარება ითხოვა.