პარტია 2022 წლის 27 ნოემბერს პირველ ყრილობაზე დაფუძნდება.

რატომ არის მნიშვნელოვანი: მწვანეები აცხადებენ, რომ ეს იქნება პირველი მემარცხენე-ცენტრისტი, ქვიარ და ფემინისტური პარტია, რომელიც მონაწილეობას მიიღებს 2024 წლის საპარლამენტო არჩევნებში.

  • მათი განცხადებით, ეს ეკოლოგიურად მდგრადი და სოციალურად სამართლიანი საზოგადოების მშენებლობისკენ გადადგმული აუცილებელი ნაბიჯია;
  • მათი მიზანია გააძლიერონ მხარდაჭერა პროგრესული სოციალური მოძრაობებისთვის, რომლებსაც იგივე ხედვა აქვთ;
  • "პოლიტიკური პლატფორმით ხელს შევუწყობთ ფართომასშტაბიან მოძრაობებს და სათემო ინიციატივებს, რომლებიც მუშაობენ ეკოლოგიური პასუხისმგებლობის, სოციალური სამართლიანობის, დისკრიმინირებული ჯგუფების, მშვიდობისა და საერთაშორისო განვითარებისკენ მიმართული დადებითი ქმედებებისკენ", — აცხადებენ ისინი.

დეტალები: როგორც თანადამფუძნებელი თორნიკე კუსიანი On.ge-სთან ამბობს, პარტიის მთავარი პრიორიტეტებია განათლება, თანასწორობა და ეკოლოგია, გარემოს დაცვაა.

  • "სხვა გზა აღარ დაგვრჩა. მთელი ჩვენი ძალები, მთელი ჩვენი მოხალისეობის ისტორია ეს ყველაფერი ამით თუ არ დაგვირგვინდა. ამით თუ არ დაიწყო ახალი მწვანე პოლიტიკური ძალის ისტორია სხვანაირად ვერ მივაღწევთ ცვლილებებს ქვეყანაში", — ამბობს კუსიანი.
  • "აქტივიზმით რა ცვლილებების მიღწევაც გვსურდა, ცხადი იყო, რომ არ გამოდიოდა, ამიტომ პოლიტიკაში სხვა მექანიზმით, პარტიული კუთხით მოსვლა ბევრად უფრო ეფექტური იქნება", — გვითხრა კიდევ ერთმა თანადამფუძნებელმა, ნინო გოგოჭურმა.

გარდა ამისა, თორნიკე კუსიანის განცხადებით, პარტიას ექნება მკაფიო ღირებულებები — "პოლიტიკურ თამაშს კი არ აწარმოებს იმისთვის, რომ უბრალოდ ამომრჩევლები მოხიბლოს, გულწრფელი იქნება თავის ღირებულებებში".

  • "ვემიჯნებით დომინანტურ პოლიტიკურ პარტიებს, რომლებმაც მოიყვანეს ქვეყანა ამ მდგომარეობამდე და ადამიანებს ცვლილების იმედი დაუკარგეს", — გვეუბნება კუსიანი.
  • ნინო გოგოჭური აცხადებს, რომ საზოგადოებაში ძალიან დიდი ხანია, არის მზაობა, ზუსტად ისეთი პოლიტიკური ძალისთვის, როგორსაც ქმნიან — "სოციალურ საკითხებზე საუბარი ძალიან აკლია ჩვენს პოლიტიკას".